Фуқаҳолар истилоҳида-Пайғамбар соллаллоҳу алайҳи васалламдан собит бўлган, фарз ёки вожиб бўлмаган нарсаларга-Суннат, дейилади.

Фуқаҳолар истилоҳидаги Суннат, бидъатнинг муқобилидаги нарсадир. Маълумки, Пайғамбар соллаллоҳу алайҳи васалламдан собит бўлган нарса ила фарз, вожиб ва бошқа ҳукмлар чиқишини ҳаммамиз жуда яхши биламиз. Демак, фуқаҳолар истилоҳи ила назар соладиган бўлсак, Пайғамбаримиз соллаллоҳу алайҳи васалламдан содир бўлган, шаръий ҳукм бўлишга салоҳияти бор ҳар бир нарса ҳам суннат бўлавермайди. Балки ўша нарсалардан фарз ва вожибнинг савиясидан кейин келадиганларигина Суннат бўлади. Ушбу, фуқаҳолар истилоҳидаги Суннатнинг ҳукми нима дейилганда, у – шариат томонидан жазм бўлмаган равишда талаб қилинган нарса бўлиб, уни қилган одам савоб олади, қилмаган одам иқобга қолмайди, деган жавоб берилишини ҳам фуқаҳоларимиздан ўрганганмиз.

Очиқ-ойдин кўриниб турибдики, ушбу истилоҳдаги Суннат Пайғамбаримиз соллаллоҳу алайҳи васалламдан собит бўлган нарсалардан ўта чегараланган бир қисмини ўз ичига олади, халос. Бинобарин, зинҳор ва зинҳор, Суннатга амал қилган савоб олар экан, амал қилмаса ҳеч нарса бўлмас экан, шунинг учун Пайғамбар соллаллоҳу алайҳи васалламдан содир бўлган нарсалардан хохлаганимизга амал қиламиз, хохламаганимизга амал қилмаймиз, дейишга ҳеч кимнинг асло ҳаққи йўқ. Шунинг учун Суннат ҳақида тўлиқ ва тўғри маълумотга эга бўлишимиз ва турли шахсларнинг бўлган-бўлмаган гапларига учмаслигимиз лозим.