601. Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам тилла узукдан қайтардилар».
Бухорий ва Муслим ривоят қилишган.

602. Жобир ибн Абдуллоҳ розияллоҳу анҳудан ривоят қилинади:
«Ҳузуримизга Набий соллаллоҳу алайҳи васаллам келдилар. Сочлари тўзиб кетган пала-партиш бир одамни кўриб қолиб:
«Манави сочини сокин қиладиган нарса топса бўлмасмиди!?» – дедилар.
Бошқа бир кишининг кийимлари кир эканлигини кўриб қолиб:
«Манави кийимини ювадиган нарса топса бўлмасмиди!?» – дедилар».
Абу Довуд, Насаий, Ибн Ҳиббон ва Ҳоким ривоят қилишган.

603. Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Фитрат бештадир: хатна; ҳаром тукларни тозалаш; қўлтиқни юлиш; мўйлабни қирқиш; тирноқларни олиш», – дедилар».
Бухорий ва Муслим ривоят қилишган.
«Фитрат» сўзи бу ўринда Анбиёлардан суннат бўлиб келаётган покланиш маъносини билдиради.
 
604. Анас ибн Молик розияллоҳу анҳудан ривоят қилинади:
«Биз учун мўйлабни қайчилаш, тирноқларни қисқартиш, қўлтиқни юлиш ва қовуқни қиришни қирқ кечадан кўпга қолдирмаслигимизга вақт белгиланган».
Муслим ривоят қилган.

605. Абдуллоҳ ибн Умар розияллоҳу анҳудан ривоят қилинади:
«Набий соллаллоҳу алайҳи васаллам:
«Ким манманлик ила кийимини судраб юрса, қиёмат куни Аллоҳ унга назар солмас», – дедилар.
«Ё Расулаллоҳ, албатта, менинг изоримнинг бир тарафи уни ушлаб юрмасам тушиб қоладир?» – деди Абу Бакр.
«Сен манманлик ила қиладиганлардан эмассан», – дедилар».
Бухорий ва Муслим ривоят қилишган.

606. Абдуллоҳ ибн Умар розияллоҳу анҳудан ривоят қилинади:
«Набий соллаллоҳу алайҳи васаллам:
«Ким манманлик ила кийимини судраб юрса, қиёмат куни Аллоҳ унга назар солмас», – дедилар».
Бухорий ва Муслим ривоят қилишган.

607. Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Қачон кийим кийсангиз ва қачон тоҳарат қилсангиз, ўнг томонингиздан бошланг», – дедилар».
Абу Довуд, Ибн Хузайма ва Ибн Ҳиббон ривоят қилишган.
Бошқа ривоятда:
«Расулуллоҳ соллаллоҳу алайҳи васаллам кўйлак кийсалар, ўнгидан бошлар эдилар», дейилган.

608. Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Сизлардан бирингиз оёқ кийими кийса, ўнгидан бошласин. Агар ечадиган бўлса, чапидан бошласин. Икковини бирга кийиб, бирга ечсин», – дедилар».
 Бухорий ва Муслим ривоят қилишган.

609. Оиша розияллоҳу анҳодан ривоят қилинади:
«Набий соллаллоҳу алайҳи васаллам ўз ишларининг барчасида имкони борича ўнгдан бошлашни яхши кўрар эдилар: тоҳаратларида ҳам, соч парваришларида ҳам, оёқ кийими кийишларида ҳам ва мисвок қилишларида ҳам».
Бухорий ва Муслим ривоят қилишган.

610. Ибн Умар розияллоҳу анҳудан ривоят қилинади:
«Набий соллаллоҳу алайҳи васаллам:
«Ким шуҳрат кийимини кийса, Аллоҳ унга қиёмат куни унга ўхшаш кийим кийдиради.  Сўнгра унга ўт қаланади», – дедилар».
Абу Довуд ва Ибн Можа ривоят қилишган.

611. Молик ибн Назла Жашмий розияллоҳу анҳудан ривоят қилинади:
«Набий соллаллоҳу алайҳи васалламнинг ҳузурларига хароб кийимда келдим. Ул зот:
«Молу мулкинг борми?» – дедилар.
«Ҳа», – дедим.
«Қайси молу мулкдан?» – дедилар.
«Туядан, қўйдан, отдан ва қулдан», – дедим.
«Қачонки, Аллоҳ сенга молу дунё берар экан, Аллоҳнинг сенга берган неъматининг ва икромининг асари кўринсин!» – дедилар».
Абу Довуд, Насаий, Ибн Ҳиббон ва Ҳоким ривоят қилишган.

612. Абдуллоҳ ибн Амр розияллоҳу анҳудан ривоят қилинади:
«Расулуллоҳ соллаллоҳу алайҳи васаллам:
«Албатта, Аллоҳ неъмати асарини бандасида кўришни яхши кўради», – дедилар».
Термизий ва Ҳоким ривоят қилишган.

613. Мисвар ибн Махрама розияллоҳу анҳудан ривоят қилинади:
«Расулуллоҳ соллаллоҳу алайҳи васаллам яхтак чопонлар тақсимладилар. Махрамага улардан ҳеч нарса бермадилар. Махрама:
«Эй, ўғлим, биз билан Расулуллоҳ соллаллоҳу алайҳи васалламнинг ҳузурларига юр», – деди.
У билан юриб бордим.
«Кириб, уни менга чақир», – деди.
Мен у зотни унга чақирдим. Ул зот устиларида яхтак чопон билан чиқдилар ва:
«Мана буни, сен учун олиб қўйган эдик», – дедилар».
Унга назар солди. Махрама рози бўлди».
Бухорий ва Муслим ривоят қилишган.