1202. Абу Ҳурайра розияллоҳу анҳудан ривоят қилинади:
«Абу Бакр:
«Ё Аллоҳнинг Расули! Менга эрталаб ва кечқурун айтадиган нарсани таълим беринг», деди.
«Аллоҳим! Ғайбни ва шаҳодатни билгувчи зот! Осмонлару ерни яратувчи зот! Ҳамма нарсанинг Роббиси ва Подшоҳи! Гувоҳлик бераманки, Сендан ўзга илоҳ йўқ! Сендан нафсимнинг ёмонлигидан, шайтоннинг шарридан ва ширкидан паноҳ тилайман» дегин.
Буни эрталаб, кечқурун ва ухлашга ётганингда айтгин», дедилар».
1203. Абу Ҳурайра розияллоҳу анҳудан ривоят қилинади:
«Шунга ўхшаш ва: «Робба кулли шайъин ва малийкаҳу» (ҳар бир нарсанинг подшоҳи ва эгаси) ва «Шарриш шайтони ва ширкиҳи» бор.
1204. Абу Рошид Ҳабронийдан ривоят қилинади:
«Абдуллоҳ ибн Амрнинг олдига бордим ва унга:
«Расулуллоҳ соллаллоҳу алайҳи васалламдан эшитган нарсаларингдан айтиб бер», дедим.
Шунда у менга бир саҳифани ташлади ва:
«Буни менга Расулуллоҳ соллаллоҳу алайҳи васаллам ёздирган эдилар», деди.
Унга назар солсам, қуйидагилар ёзилган экан:
«Абу Бакр Сиддийқ розияллоҳу анҳу Расулуллоҳ соллаллоҳу алайҳи васалламга илтимос қилиб:
«Ё Аллоҳнинг Расули! Менга эрталаб ва кечқурун ўқиб турадиган дуони ўргатиб қўйинг», деди. Шунда У зот:
«Эй Абу Бакр! Аллоҳим! Ғайбни ва шаҳодатни билгувчи зот! Осмонлару ерни яратувчи зот! Ҳамма нарсанинг Роббиси ва Подшоҳи! Гувоҳлик бераманки, Сендан ўзга илоҳ йўқ! Сендан нафсимнинг ёмонлигидан, шайтоннинг шарридан ва ширкидан паноҳ тилайман. Ўз нафсимга ёмонлик қилишдан ёки мусулмонга жалб қилишдан», дегин, дедилар».
|