254. Оиша розияллоҳу анҳо дедилар: Расулуллоҳ соллаллоҳу алайҳи васалламнинг ётадиган ва устида ухлайдиган тўшаклари чармдан (яъни ичига хурмо дарахтининг пўстлоқлари солинган теридан) эди.
255. Имом Муҳаммад Бокир рахимаҳуллоҳ дедилар: Оиша розияллоҳу анҳодан бир киши савол қилди: “Ўзларининг уйларида Сарвари коинот соллаллоҳу алайҳи васалламнинг тўшаклари қанақа эди?” Жавоб бердиларки, “тўшаклари ичига хурмо дарахтининг пўстлоғи тўлдирилган чарм эди”. Ҳафса розияллоҳу анҳодан бир киши сўради: “Сизнинг уйингизда Расулуллоҳ соллаллоҳу алайҳи васалламнинг тўшаклари қанақа эди?” Дедилар: “Жундан бўлган бир қўпол чодар эди, биз уни икки буклаб, Жанобнинг остларига тўшаб берар эдик. Устида Жаноб ором олар эдилар. Бир кеча мен дедим: Шу чодарни агар тўрт буклаб берсам, таглари мулойим бўлар эди. Кейин мен уни тўрт буклаб тўшаб бердим. Тонг отганда Жаноб соллаллоҳу алайҳи васаллам айтдилар: Бу кеча менинг остимга нима тўшаб бердинглар? Мен дедим: Ўзларининг ҳар кунги тўшакларини тўрт буклаб бердик, ўзларига мулойимроқ бўлсин дедик. Жаноб дедилар: Бу тўшакни аввалги ҳолига қўйиб тўшанглар, тўрт букламанглар, унинг мулойимлиги менинг таҳажжуд намози учун тезроқ туришимга монеъ бўлди.
|