Оқлик кунлари, яъни ойнинг ўн уч, ўн тўрт ва ўн бешинчи кунлари рўза афзал. Баъзилар ойнинг ўн икки, ўн уч ва ўн тўртинчи кунлари рўза тутиш афзал, дейишган. Лекин аввалгиси машҳурроқдир.
1257/1. Абу Ҳурайрадан р.а. ривоят қилинади. Дўстим Расулуллоҳ с.а.в. менга уч нарса — 1. Ҳар ойда уч кун рўза тутиш; 2. Икки ракаат зуҳо (чошгоҳ) намозини ўқиш; 3. Ухлашдан олдин витр намозини ўқишни васият қилдилар. Имом Муслим ва Бухорий ривоятлари.
1258/2. Абу Дардодан ривоят қилинди Расулуллоҳ с.а.в. менга уч нарсани васият қилдилар. То ҳаёт эканман, уни ҳеч қачон тарк этмайман. Булар: 1. Ҳар ойда уч кун рўза тутиш; 2. Зуҳо (чошгоҳ) намозини ўқиш; 3. Витр ўқимасдан олдин ухламаслик», дедилар. Имом Муслим ривоятлари.
1259/3. Абдуллоҳ ибн Амр ибн Оссдан р.а. ривоят қилинади. Расулуллоҳ с.а.в. : «Ҳар ойда уч кун рўза тутиш замон (йил) бўйи рўза тутиш билан тенгдир», дедилар. Имом Муслим ва Бухорий ривоятлари.
1260/4. Муоза ал-Адавиядан р.а. ривоят қилинади. Бу саҳобия Оишадан р.а.: «Расулуллоҳ с.а.в. ҳар ойда уч кун рўза тутармидилар?» деб сўраганларида, Оиша р.а.: «Ҳа», дедилар. Мен: «Ойнинг қайси кунида тутардилар?» десам, Оиша р.а.: «Ойнинг қайси куни эканлигига аҳамият бермасдан тутаверардилар», деб айтдилар. Имом Муслим ривоятлари.
1261/5. Абу Заррдан р.а. ривоят қилинади. Расулуллоҳ с.а.в. : «Агар ойда уч кун рўза тутсанг, уни ўн уч, ўн тўрт ва ўн бешинчи кунлари тутгин», дедилар. Имом Термизий ривоятлари.
1262/6. Қатода ибн Милҳондан р.а. ривоят қилинади. Расулуллоҳ с.а.в. бизга оқлик кунлари, яъни ўн уч, ўн тўрт ва ўн бешинчи куни рўза тутишга буюрдилар. Абу Довуд ривоятлари.
(Оқлик аталишига сабаб 13, 14, 15-кунлари ой тўлишиб, оқаради – Тарж.)
1263/7. Ибн Аббосдан р.а. ривоят қилинади. Расулуллоҳ с.а.в. хоҳ сафарда, хоҳ муқимликда бўлсинлар, оқлик кунлари, яъни ойнинг ўн уч, ўн тўрт ва ўн бешинчи кунлари оғизлари очиқ бўлмас эди. Яъни шу кунлари рўзадор бўлардилар. Имом Насаий ривоятлари.
|