1264/1. Зайд ибн Холид ал-Жуҳанийдан р.а. ривоят қилинади. Расулуллоҳ с.а.в. : «Ким рўзадор кишига ифторлик қилиб берса, у кишига ҳам рўза тутганнинг ажридек савоб берилади. Бу билан рўзадан бирор нарса камайтирилмайди», дедилар. Имом Термизий ривоятлари.
1265/2. Умму Умора Ансориядан р.а. ривоят қилинади. Бир куни Расулуллоҳ с.а.в. бу саҳобия ҳузурларига киргандилар, у киши Расулуллоҳга с.а.в. таом тортиқ қилдилар. Расулуллоҳ с.а.в. : «Ўзинг ҳам егин», дегандилар, саҳобия: «Мен рўзадорман», дедилар. Шунда Расулуллоҳ с.а.в. : «Рўза тутган қайси одамнинг олдида бошқалар овқатланса, то еб тугатгунларича (ёки тўйгунларича) фаришталар рўзадор ҳаққига дуода бўлишади», дедилар. Имом Термизий ривоятлари.
1266/3. Анасдан р.а. ривоят қилинади. Расулуллоҳ с.а.в. Саъд ибн Убоданикига ифторлик қилгани борганларида, у нон ва ёғ қўйди. Расулуллоҳ с.а.в. улардан тановул қилиб, сўнг: «Афтора ъиндакум соимуна ва акала тоъамакум ал-аброро ва соллат ъалайкум ал-малаикаҳ», деб айтдилар. (Маъноси: Рўзадорлар сизларнинг ҳузурингизда ифтор қилишди. Яхшилар овқатларингиздан танаввул қилишди. Ва фаришталар сизларга саловот айтишди.) Абу Довуд ривоятлари.
|