1241/1. Абу Ҳурайрадан р.а. ривоят қилинади. Расулуллоҳ с.а.в. : «Агар сизлардан бирингиз унутиб бирор нарсани еб ёки ичиб қўйса, рўзасини давом эттираверсин. Чунки Аллоҳ у кишини овқатлантириб, ичимлик ила сийлабди», дедилар. Имом Муслим ва Бухорий ривоятлари.
1242/2. Лақит ибн Сабрадан р.а. ривоят қилинади. Мен: «Эй Аллоҳнинг Расули, таҳорат ҳақида хабар беринг», десам, у зот: «Таҳоратингни мукаммал қил ва бармоқларинг орасини ҳилол қил, яъни бир-бирига кириштириб, сув етказ. Бурунга сув олганда муболаға қилиб, адо эт. Лекин рўзадор бўлсанг, бундай қилмагин», деб айтдилар. Абу Довуд ва Термизий ривоятлари.
1243/3. Оишадан р.а. ривоят қилинади. Расулуллоҳ с.а.в. жунуб бўлиб қолиб, ғусл қилишларидан олдин субҳ содиқ кириб қоларди. Кейин ғусл қилиб рўзаларини тутаверардилар. Имом Муслим ва Бухорий ривоятлари.
1244/4. Оиша р.а. ва Умму Саламалардан р.а. ривоят қилинади. Расулуллоҳ с.а.в. жунублик ҳолларида тонг отиб қолар эди. Бу жунублик эҳтилом бўлганларидан эмас, балки аёллари билан шаръий қовушганларидан содир бўлар эди. Кейин у зот рўзаларини давом эттираверардилар. Имом Муслим ва Бухорий ривоятлари.
Фойда: Жумҳур салафлар ва кейинги уламолар ижмоъси субҳдан олдинги жанобат хоҳ эҳтилом сабабли, хоҳ аёли билан қовушиш орқали бўлсин, зарари йўқ дейишган. Бунга Аллоҳнинг сўзидаги: «Сизларга рўза кечасида хотинларингизга қўшилиш ҳалол қилинди», дегани оят далилдир. Аммо субҳдан кейин аёли билан қовушиш орқали жунуб бўлиш ман этилгандир.
|