1099/1. Оишадан р.а. ривоят қилинади. Расулуллоҳ с.а.в. пешин фарзидан олдин тўрт ракат ва бомдод фарзидан олдинги икки ракат суннатни ҳеч тарк қилмасдилар. Имом Бухорий ривоятлари.
1100/2. Оишадан р.а. ривоят қилинади. Расулуллоҳ с.а.в. бирор ихтиёрий намозга бомдод намозининг икки ракат суннатига эътибор берганчалик аҳамият бермасдилар. Имом Бухорий ва Муслим ривоятлари.
1101/3. Оишадан р.а. ривоят қилинади. Расулуллоҳ с.а.в. : «Бомдод намозининг икки ракат суннати дунё ва ундаги нарсалардан яхшидир», дедилар. Имом Муслим ривоятлари.
Имом Бухорий ва Муслимнинг бошқа ривоятларида «Бу бомдод намозининг икки ракат суннати дунёдаги ҳамма нарсадан яхшироқдир», дейилган.
1102/4. Абу Абдуллоҳ Билол ибн Рабоҳдан р.а. ривоят қилинади. Бу зот бомдод намозини билдириш учун Расулуллоҳ с.а.в. ҳузурларига келдилар. Ногаҳон Оиша р.а. Билолдан р.а. бир нарса сўраб, машғул қилиб қўйдилар. Ҳаттоки тонг ёришиб кетди. Кейин Билол туриб қайта-қайта чақирдилар. Расулуллоҳ с.а.в. эса чиқавермадилар. Кейин одамларга намоз ўқиб берганларидан сўнг Билол р.а.: «Оиша бир нарса сўраган эди. Ўша нарсага машғул бўлиб кечикиб қолдим. Ҳаттоки тонг ёришиб кетди. Сиз ҳам, эй Расулуллоҳ, кечикиб чиқдингиз. Бунга нима сабаб?» деганларида, Расулуллоҳ с.а.в. : «Мен бомдоднинг икки ракат суннатини ўқиётган эдим», дедилар. Шунда Билол р.а.: «Эй Аллоҳнинг Расули, тонг жуда ёришиб кетган эди-ку?» дегандилар, Расулуллоҳ с.а.в. : «Агар тонг бундан кўпроқ ёришганида ҳам икки ракат суннатни мукаммал, чиройли суратда адо қилар эдим», дедилар. Абу Довуд ривоятлари.
|