1070/1. Усмон ибн Аффондан р.а. ривоят қилинади. Расулуллоҳ с.а.в. : «Ким хуфтон намозини жамоат билан ўқиса, кечанинг ярмини ибодат билан бедор ўтказгандай бўлади. Кимки бомдод намозини жамоат ила ўқиса, бутун кечани ибодат билан ўтказгандай бўлади», дедилар. Имом Муслим ривоятлари.
Имом Термизийнинг Усмон ибн Аффондан р.а. қилган ривоятларида Расулуллоҳ с.а.в. : «Ким хуфтон намозини жамоат билан ўқиса, кечанинг ярмини ибодат билан бедор ўтказганнинг савобига эришибди. Ким хуфтон ва бомдод намозларини жамоат билан ўқиса, кечанинг барчасини бедор ўтказганнинг савобига эришибди», дедилар. Имом Термизий бу ҳадиси шарифни саҳиҳ, ҳасан, деб айтганлар.
1071/2. Абу Ҳурайрадан р.а. ривоят қилинади. Расулуллоҳ с.а.в. : «Агар одамлар хуфтон ва бомдод намозини жамоат билан ўқишнинг савобини билишганида эди, унга эмаклаб бўлса ҳам келишар эди», дедилар. Имом Бухорий ва Муслим ривоятлари.
1072/3. Абу Ҳурайрадан р.а. ривоят қилинади. Расулуллоҳ с.а.в. : «Мунофиққа бомдод ва хуфтондан оғирроқ намоз йўқдир. Агар улар икковидаги савобни билишганида эди, эмаклаб бўлса ҳам келишар эди», дедилар. Имом Бухорий ва Муслим ривоятлари.
|