951/1. Анасдан р.а. ривоят қилинади. Расулуллоҳ с.а.в. : «Қайси бир мусулмон кишининг балоғат ёшига етмаган уч фарзанди вафот этса, Аллоҳ таоло уларнинг ота-оналарини фазли ва марҳамати билан жаннатга киргизади», дедилар. Имом Бухорий ва Муслим ривоятлари.
952/2. Абу Ҳурайрадан р.а. ривоят қилинади. Расулуллоҳ с.а.в. : «Мусулмонлардан қайси бир кишининг учта фарзанди вафот этса, дўзахга тушмайди. Фақат қасамнинг ижро этилиши учунгина тушиб чиқилади», дедилар. Имом Бухорий ва Муслим ривоятлари.
Қасамнинг ижро этилишидан мақсад Аллоҳнинг:
«Сизлардан ҳар бирингиз унга (жаҳаннамга) тушгувчидирсиз» сўзи ирода қилингандир (Марям сураси, 71-оят).
953/3. Абу Саид ал-Худрийдан р.а. ривоят қилинади. Бир хотин Расулуллоҳ с.а.в. ҳузурларига келиб: «Эй Аллоҳнинг Расули!, эркаклар айтиб берган ҳадисларингиз орқали (илмда) ўзиб кетишди. Биз аёлларга ҳам бир кунингизни ажратиб, Аллоҳ сизга ўргатган нарсалардан бизга ҳам таълим берсангиз», деганида, Расулуллоҳ с.а.в. : «Шу, шу кунлари тўпланингиз», деб буюрдилар. Бас, аёллар жамланишди. Расулуллоҳ с.а.в. ҳам келиб, Аллоҳ ўргатган нарсалардан аёлларга таълим бердилар. Кейин у зот: «Қайси бир хотин учта боласини (ўзидан олдин қабрга) жўнатса, ўша болалари у аёл учун дўзахдан тўсиқ бўлади», дедилар. Шунда бир хотин: «Иккита бўлса-чи?» деди. Расулуллоҳ с.а.в. : «Иккита бўлса ҳам», дедилар. Имом Бухорий ва Муслим ривоятлари.
|