884/1. Абулхаттоб Қатодадан р.а. ривоят қилинади. Мен Анасга р.а.: «Расулуллоҳ с.а.в. саҳобаларида қўл бериб сўрашиш одати бормиди?» десам, у зот: «Ҳа», деб жавоб бердилар. Имом Бухорий ривоятлари.
885/2. Анасдан р.а. ривоят қилинади. Расулуллоҳ с.а.в. ҳузурларига Яман аҳли келса: «Сизларнинг ҳузурингизга Яман аҳли келишди. Улар қўл бериб сўрашишни аввал жорий қилган қавмдир», дердилар. Абу Довуд ривоятлари.
886/3. Бародан р.а. ривоят қилинади. Расулуллоҳ с.а.в. : «Икки мусулмон йўлиқиб, қўл бериб сўрашишса, улар иккови ажралмасларидан олдин гуноҳлари кечирилади», дедилар. Абу Довуд ривоятлари.
887/4. Анасдан р.а. ривоят қилинади. Бир киши: «Эй Расулуллоҳ! Киши биродари ёки дўстига йўлиқса, бош эгадими?» деганида, «Йўқ», дедилар. «Ўзига яқинлаштириб ўпадими?» деганида, «Йўқ», дедилар. «Қўлидан ушлаб сўрашадими?» деганида, «Ҳа», деб жавоб қилдилар. Имом Термизий ривоятлари.
888/5. Сафвон ибн Ассолдан р.а. ривоят қилинади. Бир яҳудий дўстига «Анави набий ҳузурига бизни олиб бор», деди. Бас, улар Расулуллоҳнинг с.а.в. ҳузурларига бориб, тўққизта очиқ-ойдин оят ҳақида сўрашди. (Ҳадиснинг давомида) улар Расулуллоҳнинг с.а.в. қўллари ва оёқларини ўпиб, «Биз гувоҳлик берамизки, албатта, сен набийдирсан», дейишди. Имом Термизий, ва бошқалар саҳиҳ иснод ила ривоят қилишган.
889/6. Ибн Умардан р.а. ривоят қилинади. Бу зот бир қиссада: «Расулуллоҳ с.а.в. га яқин бўлиб, қўлларини ўпдик», дедилар. Абу Довуд ривоятлари.
890/7. Оишадан р.а. ривоят қилинади: «Зайд ибн Ҳориса Мадинага келганларида, Расулуллоҳ с.а.в. уйимда эдилар. Зайд келиб эшикни тақиллатдилар. Расулуллоҳ с.а.в. туриб, кийимларини судраб бориб, қучоқлашиб ўпдилар». Имом Термизий ривоятлари.
891/8. Абу Заррдан р.а. ривоят қилинади: «Расулуллоҳ с.а.в. менга: «Яхшиликлардан бирортасини паст санама! Агар биродарингга йўлиқсанг, очиқ юз ила кўришишинг ҳам яхшиликдир», дедилар». Имом Муслим ривоятлари.
892/9. Абу Ҳурайрадан р.а. ривоят қилинади. Расулуллоҳ с.а.в. Ҳасан ибн Алини р.а. ўпганларида, ҳузурларида Ақраъ ибн Ҳобис ат-Тамиймий бор эди. Шунда у: «Менинг ўнта болам бор-у, уларнинг бирортасини ўпмаганман», деди. Расулуллоҳ с.а.в. унга қарадилар-да, «Ким раҳм қилмаса, раҳм қилинмайди», дедилар. Имом Бухорий ва Муслим ривоятлари.
|