744/1. Абу Жуҳайфа Ваҳб ибн Абдуллоҳдан р.а. ривоят қилинади. Расулуллоҳ с.а.в. «Мен суяниб емайн», дедилар. Имом Бухорий ривоятлари.
Хаттобий айтадилар: Ҳадиснинг арабча лафзидаги «ал-муттакий»дан мақсад — остидаги тўшакка яхши жойлашиб ўтиришдир. Бу ерда Расулуллоҳ с.а.в. : «Таомни кўп ейиш мақсадида ёстиқ ва бошқа нарсаларга суяниб еювчилар каби эмас, балки омонат ўтириб кифоя қилгудек миқдорида ейман», дедилар. Бу Хаттобийнинг сўзлари эди. Лекин бошқалар «ал-муттакий» бир томонга ёнбошлашдир, дейишди.
745/2. Анасдан р.а. ривоят қилинади. Бу зот: «Расулуллоҳ с.а.в. икки думбаларини ерга қўйиб ва икки болдирларини тик қилган ҳолда хурмо еб турганларини кўрдим», дедилар. Имом Муслим ривоятлари.
|