Аллоҳ таоло: «Энди қачон намоз адо қилингач, ерга тарқалиб, Аллоҳнинг фазлу марҳаматидан (ризқу рўз) истайверинглар» (Жумъа сураси, 10-оят), деб айтган.

538/1. Абу Абдуллоҳ Зубайр ибн Аввомдан р.а. ривоят қилинади. Расулуллоҳ  с.а.в. : «Сизлардан бирингиз арқон олиб, тоққа чиқиб, у ердан орқасига бир боғлам ўтин ортиб, уни сотиши ва Аллоҳ бу иши билан (тиланиш, тамаъдан) сақлаб қолиши сўралганида бериб-бермайдиган кишилардан тиланишдан кўра яхшироқдир», дедилар. Имом Бухорий ривоятлари.

539/2. Абу Ҳурайрадан р.а. ривоят қилинади. Расулуллоҳ  с.а.в. : «Сизлардан бирингизнинг орқасига бир боғлам ўтинни ортиб, кун ўтказиши сўралганида бериб-бермайдиган кишилардан тиланишдан кўра яхшироқдир», дедилар. Имом Бухорий ва Муслим ривоятлари.

540/3. Абу Ҳурайрадан р.а. ривоят қилинади. Расулуллоҳ  с.а.в. : «Довуд алайҳиссалом қўллари ила меҳнат қилиб, ўз касблари орқали тирикчилик қилардилар», деб айтдилар. Имом Бухорий ривоятлари.

541/4. Абу Ҳурайрадан р.а. ривоят қилинади. Расулуллоҳ  с.а.в. : «Закариё алайҳиссалом дурадгор эдилар», деб айтдилар. Имом Муслим ривоятлари.

542/5. Миқдод ибн Маъди Карибадан р.а. ривоят қилинади. Расулуллоҳ  с.а.в. : «Бирор киши қўли билан меҳнат қилиб, касби орқали еган таомидан яхшироқ таом ея олмайди. Чунки Аллоҳнинг пайғамбари Довуд алайҳиссалом ҳам ўз касблари орқали тирикчилик қилардилар», деб айтдилар. Имом Бухорий ривоятлари.