Мусулмонлар жамоаси Расулуллоҳ (с.а.в.) даврларидан бошлаб беш вақт намозларига қўшиб витр намозини ҳам ўқиб келадилар. Зотан, Расулуллоҳ (с.а.в.) мана бундай деб марҳамат қилганлар:
الوتر حق فمن لم يوتر فليس منا
“Витр ҳақдир, демак, кимки витр ўқимаса, биздан эмас!” (1)
Имом Абу Довуд ривоятида келишича, Пайғамбаримиз (с.а.в.) ушбу ҳадиси шарифни уч марта такрор қилиб айтган эканлар. (2)
Мазкур ҳадис сабаби билан ҳам баён этилган:
إن الله وتر يحب الوتر فمن لم يوتر فليس منا
“Албатта Аллоҳ тоқдир, тоқни яхши кўради. Шунинг учун кимки витр ўқимаса, демак, у биздан эмас!” (3)
Мазкур ҳадиси шарифларга суяниб, ҳанафий мазҳаб олимлари витр намозини вожиб деган қарорга келганлар ва унинг қазоси ҳам ўқилиши лозим, деган фатвони берганлар.

***

1. Аҳмад 2/9715; 5/23069; Байҳақий “Сунан ал-кубро” 2/4251; Ҳоким 1/1146; Суютий “Жамъ ал-жавомеъ” 1/6613, 10884; Ҳайсамий “Мажмаъ аз-завоид” 2/3439; Исҳоқ ибн Роҳвайҳ 1/97; Табризий 1/1278; Ибн Абу Шайба “Мусаннаф” 2/6932, 6934.
2. Абу Довуд 1/1421.
3. Байҳақий “Маърифат ас-сунан ва-л-асор” 4/1418; Абдурраззоқ 3/4579; Суютий “Жамъ ал-жавомеъ” 1/2575.