Оиша розияллоҳу анҳодан ривоят қилинади:
“Расулуллоҳ соллаллоҳу алайҳи васаллам намозларида дуо қилиб:
“Аллоҳим, албатта, мен Сендан қабр азобидан паноҳ тилайман, Масиҳ Дажжолнинг фитнасидан паноҳ тилайман, тириклик ва ўлим фитнасидан паноҳ тилайман. Аллоҳим, албатта мен гуноҳкорлик ўрни ва қарзга ботиб қолиш ўрнидан паноҳ тилайман”, дедилар. Шунда  у зотга бир сўзловчи:
“Бунча ҳам қарздан кўп паноҳ сўрайсиз?!” деди.
“Агар киши қарзга ботса, гапирса, ёлғон гапиради, ваъда берса, хилоф қилади”, дедилар”.

 Абдурраҳмон ибн Абу Лайлонинг отаси розияллоҳу анҳу айтади:
“Расулуллоҳ соллаллоҳу алайҳи васалламнинг ёнларида нафл намоз ўқидим. У зотнинг:
“Аллоҳдан дўзахдан паноҳ тилайман, дўзах аҳлига войдир”, деяётганларини эшитдим”.

Абу Ҳурайра розияллоҳу анҳу айтади:
“Расулуллоҳ соллаллоҳу алайҳи васаллам намозга турдилар. Биз ҳам у зот билан бирга турдик. Шунда бир аъробий намозда: “Аллоҳим, менга ва Муҳаммадга раҳм қил. Биз билан бирга бошқа ҳеч кимга раҳм қилма”, деди. Расулуллоҳ соллаллоҳу алайҳи васаллам салом бергач Аллоҳ азза ва жалланинг раҳматини қасд қилиб аъробийга:
“Батаҳқиқ, кенгни тор қилдинг”, дедилар.    

Ибн Аббос розияллоҳу анҳумодан ривоят қилинади:
“Набий соллаллоҳу алайҳи васаллам қачон “Саббиҳма Роббикал аъла”ни қироат қилсалар: “Субҳана Роббиял Аъла”, дердилар”.
Абу Довуд айтади: "Ушбу ҳадисда Вакеъ ихтилоф қилинди. Уни Абу Вакеъ ва Шуъба Абу Исҳоқдан, у Саъийд ибн Жубайрдан, у эса Ибн Аббосдан мавқуф ҳолда ривоят қилди".

Мусо ибн Абу Оиша айтади:
“Бир киши уйининг тепасида намоз ўқир ва қачон: “Ана ўша Зот ўликларни тирилтиришга қодир эмасми?!”*ни қироат қилса: “Субҳанака”, деб йиғларди. Ундан ана шу тўғрида сўрашганида: “Мен уни Расулуллоҳ соллаллоҳу алайҳи васалламдан эшитганман”, деди. Абу Довуд айтади: "Аҳмад: “Мени фарзда Қуръондаги нарса билан дуо қилиши ажаблантирди", деди”.   

*Қиёмат сураси 40-оят.