Ибн Умар розияллоҳу анҳумо айтади: “Расулуллоҳ соллаллоҳу алайҳи васаллам қачон икки ракатдан турсалар такбир айтиб, икки қўлларини кўтарардилар”.

Алий ибн Абу Толиб розияллоҳу анҳудан ривоят қилинади:
“Расулуллоҳ соллаллоҳу алайҳи васаллам қачон фарз намозга турсалар такбир айтар ва икки қўлларини елкалари баробарида кўтарардилар. Мана шунга ўхшашни қачон қироатни тугатсалар ва рукуъ қилишни хоҳласалар бажарардилар. Қачон рукуъдан (бошлари) кўтарсалар ҳам шуни қилардилар. Икки қўлларини намозларидан бирор нарсада ўтирган ҳолларида кўтармас эдилар. Қачон икки саждадан турсалар икки қўлларини худди ана шундай кўтарар ва такбир айтардилар”. Абу Довуд айтади: "Абу Ҳумайд Соъидийнинг Набий соллаллоҳу алайҳи васалламнинг намозларини сифатгандаги ҳадисида (айтади): “Қачон икки ракатдан турсалар, худди намоз бошлаш пайтида такбир айтганларидек, икки қўлларини то улар елкалари баробарида бўлгунча кўтарардилар".

Молик ибн Ҳувайрис розияллоҳу анҳу айтади:
“Набий соллаллоҳу алайҳи васалламни қачон такбир айтсалар, рукуъ қилсалар ва рукуъдан бошларини кўтарсалар то қулоқлари бўлагига етгунча икки қўлларини кўтараётганларини кўрдим”.

Абу Ҳурайра розияллоҳу анҳу айтади:
“Агар Набий соллаллоҳу алайҳи васалламнинг олдиларида бўлганимда, албатта у зотнинг қўлтиқ остиларини кўрган бўлардим”. Убайдуллоҳ ибн Муоз зиёда қилиб айтади: “Лоҳиқ айтади: “Кўрмайсанми, албатта у намозда Расулуллоҳ соллаллоҳу алайҳи васалламнинг олдиларида бўлиши имконсизку?”. Мусо ибн Марвон ар-Руққий зиёда қилади: “Яъни, қачон такбир айтиб икки қўлларини кўтарсалар”.

Абдуллоҳ розияллоҳу анҳу айтади:
“Расулуллоҳ соллаллоҳу алайҳи васаллам бизга намозни таълим бердилар. Такбир айтиб икки қўлларини кўтардилар. Рукуъ қилгач икки қўлларини икки тиззалари орасига мутобиқ қилдилар”. Мана шу Саъдга етди. У: “Биродарим тўғри айтибди, дарҳақиқат ана шуни бажарар эдик. Кейин бизни мана бунга яъни икки тиззани ушлашга буюрдилар”, деди.