Оишадан ривоят қилинади. У шундай деди:
“Мен Набий соллаллоҳу алайҳи васаллам ва қибла ўртасида бўлардим”.
Шуъба шундай деди: “Менимча, у (Оиша): “Мен ҳайзли эдим”, деди.
Абу Довуд шундай деди: “Бу ҳадисни Зуҳрий , Ато, Абу Бакр ибн Ҳафс, Ҳишом ибн Урва, Ирок ибн Молик, Абул Асвад, Тамийм ибн Саламаларнинг барчаси Урвадан, у эса Оишадан ривоят қилишган. Иброҳийм Асваддан, у Оишадан, Абуззуҳо Масруқдан, у Оишадан, Қосим ибн Муҳаммад ва Абу Саламалар Оишадан ривоят қилишганида: “Ва мен ҳайзли эдим”, деган жумлани зикр қилишмаган”.

Оишадан ривоят қилинади:
“Албатта, Расулуллоҳ соллаллоҳу алайҳи васаллам кечқурунги намозни ўқир эканлар, у (Оиша), у зот ва қибла ўртасида, у зот ётадиган кўрпада кўндаланг ухлаган ҳолда бўларди. Қачонки витр ўқимоқни хоҳласалар уни уйғотардилар, бас, у (ҳам) витр ўқиб оларди”.

Оишадан ривоят қилинади. У шундай деди:
“Бизни эшак ва итга аралаштириб юборганинглар нақадар ёмон. Батаҳқиқ мен Расулуллоҳ соллаллоҳу алайҳи васалламнинг намоз ўқиганларини кўрганман. Мен у зотнинг олдиларида кўндаланг ҳолда (ётардим). Агар сажда қилмоқни хоҳласалар, оёғимга қўлларини теккизардилар. Мен оёғимни ўзимга йиғиб олардим. Сўнгра сажда қилардилар”.

Оишадан ривоят қилинади. Албатта у шундай деди:
“Мен ухлаётган бўлардим. Оёқларим эса Расулуллоҳ соллаллоҳу алайҳи васалламнинг олдиларида эди. Шу ҳолда у зот кечаси намоз ўқирдилар. Агар сажда қилишни хоҳласалар, оёқларимга урардилар. Бас мен оёқларимни йиғиб олардим, шунда сажда қилардилар”.

Оишадан ривоят қилинади. Албатта у шундай деди:
“Расулуллоҳ соллаллоҳу алайҳи васалламнинг қиблаларида кўндаланг ҳолда ухлар эдим. Расулуллоҳ соллаллоҳу алайҳи васаллам амоз ўқир эканлар, мен олдиларида (бўлардим). Агар витр ўқимоқни хоҳласалар... Усмон “менга теккизардилар”ни зиёда қилиб, сўнгра қуйидаги жумлада иккала ровий (Усмон ва ал-Қаънабий) иттифоқ қилишди:
“Бас, у зот:
“Ўзингни четга ол”, дердилар”.