Абу Саид (розияллоҳу анҳу)дан ривоят қилинади:
“Албатта, Расулуллоҳ соллаллоҳу алайҳи васаллам:
“Агар бирингиз намоз ўқиса, олдидан ҳеч кимни ўтказмасин, қўлидан келганча у (ўтувчини) қайтарсин. Агар кўнмаса, уришсин. Ундоқ одам шайтондир”, дедилар”.    

Абу Саид ал-Худрий отасидан ривоят қилади. У шундай деди:
“Расулуллоҳ соллаллоҳу алайҳи васаллам шундай дедилар:
“Агар сизлардан бирингиз сутрага (қараб) намоз ўқиса, унга яқин турсин”.
 Сўнгра юқоридаги ҳадиснинг маъносини давом эттирди.

Сулаймоннинг қўриқчиси Абу Убайд шундай деди:
“Ато ибн Язид ал-Лайсийнинг тик турган ҳолда намоз ўқиётганини кўриб, унинг олдидан ўтсам, мени қайтарди. Сўнг шундай деди:
“Абу Саид ал-Худрий менга ҳадис айтиб берди. Албатта, Расулуллоҳ соллаллоҳу алайҳи васаллам:   
“Сизлардан ким ўзи билан қибласи орасида бирор кишининг тўсиқ бўлмаслигига қодир бўлса, шуни қилсин”, дедилар”.

Абу Саид (розияллоҳу анҳу) Марвоннинг ҳузурига кириб, шундай деди:
“Расулуллоҳ соллаллоҳу алайҳи васалламнинг шундай деяётганларини эшитганман:
“Қачон бирингиз ўзини одамлардан тўсиб турадиган нарсага қараб намоз ўқиса-ю, биров унинг олдини кесиб ўтмоқчи бўлса, бас, уни кўкрагидан даф қилсин. Агар кўнмаса, уришсин. Ундоқ одам шайтондир”.
Абу Довуд шундай деди: “Суфён ас-Саврий шундай деди: “Мен намоз ўқиётганимда олдимдан бир киши кибр қилиб  ўтаётган эди уни қайтардим. Заиф киши ўтаётган эди уни қайтармадим”.