Абдулҳамид ибн Маҳмуд шундай деди:
“Мен жума куни Анас ибн Молик билан намоз ўқидим. Биз устунларга сурилиб, олдинма-кетин бўлиб қолдик. Шунда Анас:
“Биз Расулуллоҳ соллаллоҳу алайҳи васаллам замонларида мана шундан сақланар эдик”, деди”.

Сафда имомга яқин бўлмоқлик мустаҳаб қилинган киши ва кечикмоқлик макруҳлиги ҳақида

Абу Масъуддан ривоят қилинади. У шундай деди:
“Расулуллоҳ соллаллоҳу алайҳи васаллам:
“Менга сизлардан етуклик ва ақл эгалари яқин турсин. Сўнгра уларга яқин келадиганлар, сўнгра уларга яқин келадиганлар”, дедилар”.

Абдуллоҳ (розияллоҳу анҳу) Набий соллаллоҳу алайҳи васалламдан ушбу ҳадиснинг мислини ривоят қилиб, унга зиёда қилиб қуйидагини келтиради:
 “Ихтилоф қилманглар, (агар шундай қилсанглар) қалбларингиз ихтилоф қилиб қолади. Бозорларнинг шовқинидан эҳтиёт бўлинг”, дедилар”.

Оиша (розияллоҳу анҳо)дан ривоят қилинади. У шундай деди:
“Расулуллоҳ соллаллоҳу алайҳи васаллам:
“Албатта, Аллоҳ ва Унинг фаришталари сафларнинг ўнг томонидагиларига саловат айтади”, дедилар”.