Умму Варақа бинти Навфалдан ривоят қилинади: “Албатта, Набий соллаллоҳу алайҳи васаллам Бадр ғазотига чиққанларида (Умму Варақа) шундай деди: “Мен у зот соллаллоҳу алайҳи васалламга: “Эй Аллоҳнинг Расули, менга ҳам сиз билан бирга ғазотга чиқишимга рухсат беринг, касалларингизни муолажа қилардим. Шоядки, Аллоҳ мени шаҳодат билан ризқлантирса”, дедим. У зот соллаллоҳу алайҳи васаллам: “Уйингни лозим тут, албатта, Аллоҳ таоло сени шаҳодат билан ризқлантиради”, дедилар. Ровий шундай деди: “У аёлни “Шаҳийда” деб номланарди”. Ровий шундай деди: “У дарҳақиқат, Қуръон ўқирди. Набий соллаллоҳу алайҳи васалламдан ҳовлисида муаззин тутмоқликка изн сўраганда, унга рухсат бердилар”. Ровий шундай деди: “Унинг бир қули ва бир чўриси бўлиб, иккисини мудаббар* қилиб қўйган эди. У иккиси кечаси туриб, Умму Варақанинг қотийфа*си билан ўлгунча бўғиб туришди ва қочиб кетишди. Умар эрта тонгда кишилар орасида туриб: “Кимда бу иккиси тўғрисида маълумот бор?” ёки: “Ким уларни кўрса олиб келсин”, деди. Иккисини осишга буюрди. Мадинада биринчи осилган кишилар шу иккиси эди”.
*Ҳожа қулига, ортимда қолсанг озодсан, деса, ўша қул мудаббар бўлади. Яъни, ҳожаси ўлгач, у озод бўлади. *Аёллар ёпинчиғи.
Абдурраҳмон ибн Халлод Умму Варақа бинти Абдурраҳмон ибн Ҳорисдан ушбу ҳадисни ривоят қилган. Аввалгиси тўлиқроқдир. Ровий шундай деди: “Расулуллоҳ соллаллоҳу алайҳи васаллам Умму Варақанинг уйига бориб зиёрат қилар эдилар. Бас, у зот унга азон айтиб берадиган муаззин қилиб бердилар ва унга (Умму Варақага) уй аҳлига имомлик қилишига амр қилдилар. Абдурраҳмон: “Мен у аёлнинг муаззини қари чол эканини кўрдим”, деди”.
|