Набий соллаллоҳу алайҳи васалламнинг аёллари Оиша розияллоҳу анҳодан ривоят қилинади: “У киши: “Агар Расулуллоҳ соллаллоҳу алайҳи васаллам аёллар нимани пайдо қилганларини кўрганларида, уларни масжиддан худди Бани Исроил аёллари ман қилинганларидек ман қилган бўлур эдилар”, деди. Яҳё шундай деди: “Мен Амрога: “Бани Исроил аёллари ман қилинганмидилар?” дедим. У: “Ҳа!” деди”.
Абдуллоҳ розияллоҳу анҳудан ривоят қилинади: “Набий соллаллоҳу алайҳи васаллам: “Аёл кишининг ҳужрасидаги намози ҳовлисидаги намозидан, қазноғидаги намози ҳужрасидаги намозидан афзалдир”, дедилар”.
Ибн Умар розияллоҳу анҳудан ривоят қилинади. У киши шундай деди: “Расулуллоҳ соллаллоҳу алайҳи васаллам: “Ушбу эшикни аёллар учун (ажратиб) қўйсак”, дедилар. Нофеъ шундай деди: “Ибн Умар вафот топгунча ушбу эшикдан кирмади”.Абу Довуд шундай деди: “Исмоил ибн Иброҳим ҳадисни Айюбдан, у эса Нофеъдан ривоят қилади. Нофеъ шундай деди: “Умар шундай деди...”. Ушбу (тариқа) саҳиҳроқдир”.
|