Абу Ҳурайра розияллоҳу анҳу шундай деди:
“Расулуллоҳ с.а.нинг шундай деганларини эшитдим:
“Агар намозга такбир айтилса, унга шошилиб келманглар. Юриб, ўзларингизга хотиржамликни лозим тутган ҳолда келинглар. Нимани топсанглар ўқинглар, нимани ўтказиб қўйган бўлсанглар, тамом қилиб қўйинглар”.
Абу Довуд шундай деди: “Шунингдек аз-Зубайдий, ибн Абу Зеъб, Иброҳим ибн Саъд, Маъмар, Шуайб ибн Абу Ҳамзалар аз-Зуҳрийдан ривоят қилиб:
“...нимани ўтказиб қўйган бўлсанглар, тамом қилиб қўйинглар”, деган. Ибн Уяйнанинг ёлғиз ўзи Зуҳрийдан ривоят қилганда:
“...нимани ўтказиб қўйган бўлсанглар, қазосини ўқинглар”, деди. Муҳаммад ибн Амр Абу саламадан, у эса Абу Ҳурайра розияллоҳу анҳудан ривоят қилганда ва Жаъфар ибн Робиа ал-Аърождан, ал-Аърож эса Абу Ҳурайрадан ривоят қилганида:
“...тамом қилиб қўйинглар”, деган. Ибн Масъуд Набий соллаллоҳу алайҳи васалламдан, Абу Қатода ва Анас розияллоҳу анҳумлар Набий соллаллоҳу алайҳи васалламдан ривоят қилишганида, барчалари:
“...тамом қилиб қўйинглар”, деган”.

Ҳадис такрор келган.