Абу Ҳурайра розияллоҳу анҳудан ривоят қилинади:
“Расулуллоҳ соллаллоҳу алайҳи васаллам:
“Аллоҳнинг чўриларини Аллоҳнинг масжидларидан ман қилманглар. Лекин ҳидсиз бўлган ҳолларида чиқсинлар”, дедилар”.

Ибн Умар розияллоҳу анҳумодан ривоят қилинади. У шундай деди:
“Расулуллоҳ соллаллоҳу алайҳи васаллам:
“Аллоҳнинг чўриларини Аллоҳнинг масжидларидан ман қилманглар” , дедилар”.

Ибн Умар розияллоҳу анҳумодан ривоят қилинади. У шундай деди:
“Расулуллоҳ соллаллоҳу алайҳи васаллам:
“Аллоҳнинг чўриларини Аллоҳнинг масжидларидан ман қилманглар. Уларнинг уйлари улар учун яхшироқдир” , дедилар”.

Мужоҳиддан ривоят қилинади. У шундай деди:
“Абдуллоҳ ибн Умар:
“Набий соллаллоҳу алайҳи васаллам:
“Аёлларга кечқурун масжидга боришга изн беринглар”, дедилар”, деди. Унинг ўғли:
“Аллоҳга қасамки, биз уларга изн бермаймиз. (Агар изн берсак) фасодни ушлайдилар. Аллоҳга қасамки, биз уларга рухсат бермаймиз”, деди. Мужоҳид шундай деди:
“Абдуллоҳ ибн Умар уни сўкиб, ғазаб қилди ва:
“Мен Расулуллоҳ соллаллоҳу алайҳи васаллам уларга изн беринглар, деганлар, десам, сен, биз уларга рухсат бермаймиз, дейсанми”, деди.