Шурайк ибн Абдуллоҳ ибн Абу Намр Анас ибн Моликнинг шундай деяётганини эшитиб, ривоят қилади: “Бир киши туясида кириб, уни масжидга чўккалатди. Сўнгра туясини боғлади. Кейин: “Қайси бирингиз Муҳамммад”, деди. Расулуллоҳ соллаллоҳу алайҳи васаллам қавм орасида суянган ҳолда ўтирган эдилар. Биз унга: “Ушбу оппоқ суяниб турган киши”, дедик. Ҳалиги киши: “Эй Абудулмутталибнинг ўғли”, деди. Набий соллаллоҳу алайҳи васаллам унга: “Батаҳқиқ сенга жавоб бердим (яъни эшитаман)”, дедилар. У киши: “Эй Муҳаммад, албатта мен сиздан сўровчиман”, деди”. Ровий ҳадисни давом эттирди.
Ибн Аббос розияллоҳу анҳумодан ривоят қилинади. У шундай деди: “Бани Саъд ибн Бакр Зимом ибн Саълабани Расулуллоҳ соллаллоҳу алайҳи васаллам нинг ҳузурларига жўнатди. У Набий соллаллоҳу алайҳи васаллам нинг ҳузурларига келиб, туясини масжид эшиги олдига чўктирди. Сўнгра уни боғлади. Кейин масжидга кирди”. Ровий Муҳаммад ибн Амр юқоридаги ҳадисга ўхшашини зикр қилди. Ибн Аббос шундай деди: “У: “Қай бирингиз Абдулмутталибнинг ўғли”, деди. Расулуллоҳ соллаллоҳу алайҳи васаллам : “Абдулмутталибнинг ўғли менман”, дедилар. У: “Эй Абдулмутталибнинг ўғли”, деди”. Ровий ҳадисни давом эттирди.
Музайналик бир киши Зуҳрийга бу ҳадисни айтиб берган: “Биз Саид ибн Мусайябнинг олдида эдик. У Абу Ҳурайра розияллоҳу анҳудан ривоят қилди. Абу Ҳурайра розияллоҳу анҳу шундай деди: “Яҳудийлар Набий соллаллоҳу алайҳи васаллам нинг ҳузурларига келишди. У зот соллаллоҳу алайҳи васаллам масжидда, саҳобалари орасида ўтирган эдилар. Улар: “Эй Абул Қосим!” дейишди. Улардан бир эркак ва аёл зино қилган эди”.
|