Абу Заррдан ривоят қилинади. Ушундай деди: “Расулуллоҳ соллаллоҳу алайҳи васаллам менга: “Эй Абу Зарр, агар сенинг устингда намозни ўлдирадиган, ёки –намозни кечиктирадиган – амирлар бўлса сен қандоқ қиласан”, дедилар. Мен: “Эй Аллоҳнинг Расули, мени нимага буюрасиз?”- дедим. У зот соллаллоҳу алайҳи васаллам: “Намозни вақтида ўқи. Агар улар билан бирга намозни топсанг, уни ҳам ўқи. Албатта, у намоз сен учун нафл бўлади”, дедилар”.
Амр ибн Маймун ал-Авдийдан ривоят қилинади. У шундай деди: “Бизга Муоз ибн Жабал Яманга Расулуллоҳ соллаллоҳу алайҳи васалламнинг элчилари бўлиб келди. (Амр ибн Маймун) шундай деди: “Уни бомдодга яқин такбир айтаётганини эшитдим. У овози йўғон (ғуннали)киши эди”. (Амр ибн Маймун) шундай деди: “Унга меҳрим тушди. Шомда уни дафн қилгунимга қадар, ундан ажралмадим. Сўнгра ундан кейин инсонларнинг фақиҳроғига назар солдим. Ибн Масъуднинг олдига келиб, у вафот қилгунига қадар, доим унинг ёнида бўлдим. У (ибн Масъуд) менга шундай деди: “Расулуллоҳ соллаллоҳу алайҳи васаллам менга: “Сизларга намозларни вақтида ўқимайдиган амирлар келса, қандоқ қиласиз”, дедилар. Мен: “Менга ана шу ҳолат етса, нимага буюрасиз, эй Аллоҳнинг Расули”, дедим. У зот соллаллоҳу алайҳи васаллам: “Намозни вақтида ўқигин ва улар билан бирга намозингни нафл қил”, дедилар”.
Убода ибн Сомит розияллоҳу анҳудан ривоят қилинади.У шундай деди: “Расулуллоҳ соллаллоҳу алайҳи васаллам: “Албатта, тез кунда мендан кейин устингизга намозни вақтида ўқишдан уларни бошқа нарсалар машғул қилиб, ҳатто унинг вақтини ўтказиб қўядиган амирлар бўлади. Бас, намозни вақтида ўқинг”, дедилар. Шунда бир киши: “Эй Аллоҳнинг Расули, улар билан ҳам бирга ўқийманми?”- деди. У зот соллаллоҳу алайҳи васаллам: “Ҳа, агар хоҳласанг”, дедилар. Суфён: “Агар уларга етсам, улар билан ҳам бирга ўқийманми?- деди. У зот соллаллоҳу алайҳи васаллам: “Ҳа, агар хоҳласанг”, дедилар”.
Қобийса ибн Ваққос розияллоҳу анҳудан ривоят қилинади. У шундай деди: “Расулуллоҳ соллаллоҳу алайҳи васаллам: “Мендан кейин устингизга намозни кечиктирадиган амирлар бўлади. Бас, у сизларнинг фойдангизга ва уларнинг зараригадир. Модомики қиблага қараб намоз ўқир эканлар, улар билан бирга намоз ўқинг”, дедилар”.
|