Ибн Аббоснинг мавлоси Умайрдан ривоят қилинади. У ибн Аббос шундай деяётганини эшитди. Мен ва Набий соллаллоҳу алайҳи васалламнинг завжалари Маймуна розияллоҳу анҳонинг мавлоси Абдуллоҳ ибн Ясор иккимиз юриб, ҳатто Абу Жуҳайм ибн Ҳорис ибн Симма ал-Ансорийникига кирдик. Шунда Абу Жуҳайм: “ Расулуллоҳ соллаллоҳу алайҳи васаллам Биъру Жамал томондан келган эдилар. Шунда бир киши у зот соллаллоҳу алайҳи васалламга йўлиқиб, салом берди. Расулулоҳ соллаллоҳу алайҳи васаллам унга салом қайтармадилар. Қачонки, бир деворнинг олдига келиб, юзлари ва икки қўлларига масҳ қилганларидан кейин, унга салом қайтардилар”, деди”.
Нофеъ бизга хабар бериб, шундай деди: “Мен ибн Умар билан бирга бир ҳожат тўғрисида ибн Аббосникига бордим. Ибн Умар эҳтиёжини қондиргач, унинг ўша кунги ҳадиси шундай демоқлик бўлди: “Йўлларнинг бирида бир киши Набий соллаллоҳу алайҳи васалламнинг олдиларидан ўтаётиб, у зотга салом берган эди, у зот соллаллоҳу алайҳи васаллам ҳожатдан ёки бавлдан чиққан эдилар, унинг саломига алик қайтармадилар. Қачонки, у киши йўлда ўзини четга олмоққа ҳаракат қилди. У зот соллаллоҳу алайҳи васаллам икки қўлларини деворга уриб, уни юзларига сурдилар. Сўнгра яна бир зарба уриб, билакларига сурдилар. Кейин у кишига салом қайтардилар ва унга: “Албатта, сенга салом беришимдан ман қилган нарса, пок бўлмаганимдир”, дедилар”. Абу Довуд шундай деди: “Аҳмад ибн Ҳанбал Муҳаммад ибн Собитнинг таяммум тўғрисида мункар ҳадисни ривоят қилганини айтаётганини эшитдим”. Ибн Досаҳ шундай деди: “Абу Довуд: “Муҳаммад ибн Собит бу қиссадаги “Икки зарба”ни Набий соллаллоҳу алайҳи васалламдан ривоят қилинганига эргашмаган. Уни ибн Умарнинг феълидан ривоят қилишган”, деди”.
Ибн Умар ривоят қилиб, шундай деди: “Расулуллоҳ соллаллоҳу алайҳи васаллам қазои ҳожатдан келганларида бир киши Биъру Жамал олдида у зотга йўлиқиб, салом берди. У зот соллаллоҳу алайҳи васаллам унга алик қайтармадилар. Қачонки, бир деворнинг олдига келиб, унга қўлларини қўйдилар. Сўнгра юзлари ва икки қўлларига сурганларидан кейин Расулуллоҳ соллаллоҳу алайҳи васаллам у кишига салом қайтардилар”.
|