Оиша розияллоҳу анҳодан ривоят қилинади:
“Албатта, Расулуллоҳ соллаллоҳу алайҳи васаллам ) жанобатдан бир идишда ғусл қилар эдилар – у (идишнинг номи) фарақдир. (Фарақ ўлчов идиши бўлиб, унга ўн олти ратл сув сиғади, олти ярим литрдан кўпроқ.)
Абу Довуд айтади: “Маъмар Зуҳрийдан ривоят қилган бу ҳадисда:
“Оиша розияллоҳу анҳо шундай деди:
“Мен ва Расулуллоҳ соллаллоҳу алайҳи васаллам ) бир идишдан ғусл қилар эдик. Унда фарақнинг миқдори бор эди”, деди”.
Абу Довуд айтади: “Ибн Уяйна Молик ҳадисига ўхшаш ҳадисни ривоят қилди”.
Абу Довуд айтади: “Аҳмад ибн Ҳанбалнинг: “Фарақ ўн олти ратлдир”, деганини эшитдим. Ва яна ундан: “Ибн Абу Зеъбнинг бир соъси беш ратл ва учдан бирга тенг”,  деганини эшитдим”.
Абу Довуд: “Бас ким (бир соъ) саккиз ратлга тенг (деса) тўғрими?”- деб сўради. (Аҳмад ибн Ҳанбал): “Ана ўша сақланган эмас. (Яъни балки бу заиф сўздир. Ҳукмларда бунинг мисоли жорий қилинмас)”, деди”.
Абу Довуд айтади: “Аҳмаднинг: “Ким фитр садақасини  бизнинг ушбу ратлимизда  беш ратл ва учдан бир қилиб берса, батаҳқиқ комил қилиб берибди”, деганини эшитдим. Шунда у кишига: “Сайҳоний (Мадинанинг хурмо турларидан бири) оғирдир”, дейилди. У киши: “Сайҳоний энг тоза хурмо (унинг бир соъси кифоя қилади)”, деди. Сўнгра: “Мен (сайҳоний оғирми, сув оғирми, буни) билмайман”,деди”.