Ғудойф ибн ал-Ҳорис шундай деди:
“Оиша розияллоҳу анҳодан сўрадим:
“Расулуллоҳ соллаллоҳу алайҳи васалламнинг жанобатдан кечанинг аввалида ғусл қилганларини кўрганмисиз ёки кечанинг охиридами?”. У киши:
“Баъзан кечанинг аввалида ғусл қилардилар, баъзан эса кечанинг охирида ғусл қилар эдилар”, деди. Мен:
“Аллоҳу Акбар! Ишда кенглик қилган Аллоҳга ҳамд бўлсин!”-дедим. Яна сўрадим:
“Расулуллоҳ соллаллоҳу алайҳи васалламнинг витрни кечанинг аввалида ўқиганларини кўрганмисиз ёки кечанинг охиридами?”. У киши:
“Баъзан кечанинг аввалида витрни ўқир эдилар, баъзан эса кечанинг охирида ўқир эдилар”, деди. Мен:
“Аллоҳу Акбар! Ишда кенглик қилган Аллоҳга ҳамд бўлсин!”-дедим. Яна сўрадим:
“Расулуллоҳ соллаллоҳу алайҳи васалламнинг Қуръонни жаҳрий ўқиганларини кўрганмисиз ёки махфий ўқиганлариними?”. У киши:
“Баъзан уни жаҳрий ўқирдилар, баъзан эса махфий ўқирдилар”, деди. Мен:
“Аллоҳу Акбар! Ишда кенглик қилган Аллоҳга ҳамд бўлсин!”-дедим.

Алий ибн Абу Толиб розияллоҳу анҳу Набий соллаллоҳу алайҳи васалламдан ривоят қилади. У зот соллаллоҳу алайҳи васаллам шундай дедилар:
“Фаришталар унда сурат, ит ва жунуб бор уйга кирмайди”.

Оиша розияллоҳу анҳодан ривоят қилинади. У киши шундай деди:
“Расулуллоҳ соллаллоҳу алайҳи васаллам жунуб ҳолда сувга тегмасдан ухлар эдилар”.
Абу Довуд айтади: “Бизга Ҳасан ибн Алий ал-Воситий сўзлаб бериб, шундай деди: “Язид ибн Ҳорундан: “Бу ҳадис ваҳмдир”, деганини эшитдим”. Яъни Абу Исҳоқнинг ҳадиси (назарда тутилмоқда).