Хузайма ибн Собитдан ривоят қилинади: “Набий с.а.в: “Маҳсига масҳ тортиш мусофир учун уч кун, муқим учун бир куну бир кечадир”, дедилар”. Абу Довуд айтади: “Бу ҳадисни Мансур ибн ал-Муътамир Иброҳийм ат-Таймийдан унинг исноди билан ривоят қилиб, унда: “Агар яна зиёда қилишни сўраганимизда, зиёда қилар эдилар”, дейди”.
Убай ибн Иморадан ривоят қилинади. Яҳё ибн Айюб шундай деди: “Убай ибн Имора Расулуллоҳ с.а.в) билан бирга икки қиблада намоз ўқиган эди. У шундай деди: “Эй Аллоҳнинг Расули! Икки маҳсимга масҳ тортайми?” Расулуллоҳ с.а.в: “Ҳа”, дедилар. “Бир кунми?” деди. “Бир кун”, дедилар. “Икки кунми?” деди. “Икки кун”, дедилар. “Уч кунми?”- деди. “Ҳа, хоҳлаганинча”, дедилар. Абу Довуд шундай деди: “Бу ҳадисни ибн Абу Марям ал-Мисрий Яҳё ибн Айюбдан, у Абдураҳмон ибн Разиндан, у Муҳаммад ибн Язид ибн Абу Зиёддан, у Убода ибн Нусайдан, у эса Убай ибн Иморадан ривоят қилиб, унда шундай деди: “Ҳатто еттигача етди. Расулуллоҳ с.а.в) шундай дедилар: “Ҳа, сенга зоҳир бўлганича (яъни хоҳлаган муддатингча масҳ) тортавер”. Абу Довуд шундай деди: “Бу ҳадиснинг исноди тўғрисида ихтилоф қилинган. У кучли эмасдир. Ибн Абу Марям ва Яҳё ибн Исҳоқ ас-Сайлаҳийнийнинг Яҳё ибн Айюбдан ривоят қилишган иснодида ҳам ихтилоф қилишган”.
|