Оиша розияллоҳу анҳодан ривоят қилинади. У киши шундай дедилар:
“Мен  Расулуллоҳ соллаллоҳу алайҳи васаллам  билан бирга бир идишдан ғусл қилар эдим ва иккимиз ҳам жунуб ҳолда эдик”.

Умму Субайята ал-Жуҳаниядан ривоят қилинади. У шундай деди:
“Менинг қўлим Расулуллоҳ соллаллоҳу алайҳи васаллам  нинг қўллари билан бир идишдан таҳорат қилишда аралашар эди”.

Ибн Умар роҳияллоҳу анҳудан ривоят қилинади. У киши шундай дедилар:
“Эркаклар ва аёллар Расулуллоҳ соллаллоҳу алайҳи васаллам  замонларида таҳорат қилар эдилар”.
Мусаддад:
“Барчалари битта идишдан (таҳорат қилар эдилар)”, деди.

Абдуллоҳ ибн Умардан ривоят қилинади. У киши:
“Биз ва аёллар Расулуллоҳ соллаллоҳу алайҳи васаллам  даврларида бир идишдан таҳорат қилар эдик. Унга қўлларимизни солардик”, дедилар.