Абу Саид ал-Худрий розияллоҳу анҳудан ривоят қилинади:
“Расулуллоҳ соллаллоҳу алайҳи васалламга айтилди:
“Будоаҳ қудуғидан таҳорат қилсак бўладими, ваҳоланки унга ҳайз латталари, итларнинг гўштлари ва қусқилар ташланадику?”.
Расулуллоҳ соллаллоҳу алайҳи васаллам:
“Сув покдир, уни ҳеч нарса нажас қила олмайди”, дедилар.
Абу Довуд: “Баъзилар (Ровий Абдуллоҳ ибни Рофеъни) Абдураҳмон ибни Рофеъ дейди”, деди.

Абу Саид ал-Худрий розияллоҳу анҳу айтадилар:
“Мен Расулуллоҳ соллаллоҳу алайҳи васалламдан шундай деб сўралганини эшитдим:
“Будоаҳ қудуғидан сизга сув олиб келинади, ваҳоланки у ит гўштлари, ҳайз латталари ва инсонлар нажосати ташланадиган қудуқдир”.
Расулуллоҳ соллаллоҳу алайҳи васаллам:
“Сув покдир, уни ҳеч нарса нажас қила олмайди”, дедилар”.
Абу Довуд шундай деди:
“Қутайба ибни Саиддан шундай деганини эшитдим:
“Будоаҳ қудуғининг назоратчисидан унинг чуқурлигини сўрадим. У:
“Ундаги сув қовуққача келади”, деди.
“Агар  камайсачи?”, десам, у:
“Авратдан пастроқ бўлади”, деди”.
Абу Довуд шундай деди:
“Мен Будоаҳ қудуғини ридойим билан чамалаб кўрдим. Уни қудуқнинг устига ёздим, сўнгра ўлчадим. Унинг кенглиги олти зироъ эди. Менга боғнинг эшигини очган кишидан  кириб:
“Қудуқнинг биноси олдинги ҳолатидан ўзгарганми?”, деб сўрадим. У:
“Йўқ”, деди. Мен қудуқдаги сувнинг ранги ўзгарганлигини кўрдим”.