Тўрт юз ўттиз еттинчи ҳадис
Абу Ҳанифа (р.а.) Ҳаммоддан, у Иброҳим Асваддан, у Оиша онамиздан (р.а.) ривоят қилади. Оиша онамиз (р.а.) айтдилар: «Расулуллоҳ (с.а.в.): «Аллоҳ таоло инсонга жаннатда амали билан етиша олмайдиган юксак даражалар беради. Аллоҳ таоло унга узлуксиз касалликлар бериб, у юксак даражаларга етказади», дедилар».
Тўрт юз ўттиз саккизинчи ҳадис
Абу Ҳанифа (р.а.) Алқамадан, у Ибн Бурайдадан, у отасидан ривоят қилади. Ибн Бурайданинг отаси айтди: «Расулуллоҳ (с.а.в.) бундай дедилар: «Қул хайрли ишлар қилаётганида хасталаниб қолса, Аллоҳ таборака ва таоло фаришталарига: «Қулимга соғлигида қилган амалларнинг савобини ёзинг», дейди.
Бир ривоятда қуйидаги лафз қўшилган:
«Йўлиққан касаллигининг савоби билан бирга ёзинг».
Бир ривоятда: «Қулимга соғ бўлганида қиладиганини ёзинг», дейилади.
Бошқа бир ривоятда: «Қул бир амал қилаётганида касал бўлса, Ҳақ таборака ва таоло ҳафаза (муҳофиз, қўриқчи - Тарж.) фаришталарига бундай дейди:
- Қулимга соғ-саломат пайтида қиладиган амалининг савобини ёзинг».
Тўрт юз ўттиз тўққизинчи ҳадис
Абу Ҳанифа (р.а.) Муқотил ибн Сулаймондан, у Абу Зубайрдан, у Жобирдан (р.а.) ривоят қилади. Жобир (р.а.) айтдилар: «Набий (с.а.в.) бундай деб марҳамат қилдилар: «Аллоҳ таоло ҳар касаллик учун даво яратган. Касаллик дорисига дуч келса, Аллоҳнинг изни билан тузалади, йўқолиб кетади».
Тўрт юз қирқинчи ҳадис
Абу Ҳанифа (р.а.) Ҳаммоддан, у отасидан, у Қайс ибн Муслимдан, у Ториқ ибн Шиҳобдан, у Ибн Масъуддан (р.а.) ривоят қилади. «Набий (с.а.в.) бундай дедилар: «Аллоҳ таоло ўлим ва қариликдан бошқа, яратган бутун касалликларининг давосини яратган. Сизга сигир сутини (ичишни - Тарж.) тавсия этаман, чунки сигир сутига барча ўсимликлардан қўшади».
Тўрт юз қирқ биринчи ҳадис
Абу Ҳанифа (р.а.) Қайсдан, у Ториқдан, у Ибн Масъуддан (р.а.) ривоят қилади. Ибн Масъуд (р.а.) айтдилар: «Расулуллоҳ (с.а.в.): «Аллоҳ таоло қариликдан бошқа барча касалликнинг давосини ҳам берган. Сизга сигир сутини тавсия қиламан, чунки у ҳар хил ўтлардан ейди», дедилар».
Бир ривоятда: «Аллоҳ таоло ер юзида қарилик ва ўлимдан бошқа ҳамма касалликнинг давосини яратган. Сизга сигир сутини тавсия қиламан. Чунки сигир ҳар турли ўтлардан ейди», дейилади.
Бир ривоятда: «Аллоҳ таоло ўлим ва қариликдан бошқа берган касалликни давоси билан берган. Сизга сигир сутини тавсия қиламан, чунки у ҳар хил ўтлардан ейди» тарзда келади.
Бошқа бир ривоят лафзлари бундай: «Аллоҳ таоло ер юзидаги ҳеч бир касалликни шифосиз яратмаган. Сизга сигир сутини ичишингизни тавсия этаман, чунки у ҳар хил ўсимликлардан, ўтлардан ейди».
Тўрт юз қирқ иккинчи ҳадис
Абу Ҳанифа (р.а.) Қайсдан, у Ториқ ибн Шиҳобдан, у Абдуллоҳ ибн Масъуддан (р.а.) ривоят қилади. Ибн Масъуд (р.а.) айтдилар: «Расулуллоҳ (с.а.в.): «Сизга сигир сутини тавсия этаман, чунки сигир ҳар хил ўт-ўландан ейди. Унда ҳар касалликка шифо бор», дедилар».
Тўрт юз қирқ учинчи ҳадис
Абу Ҳанифа (р.а.) Абдуллоҳдан, у Ибн Умардан (р.а.) ривоят қилади. Ибн Умар (р.а.) айтдилар: «Расулуллоҳ (с.а.в.) марҳамат қилдилар: «Аллоҳ таоло шифони седонада, қон олдиришда, асалда, ёмғир сувида қилган».
Тўрт юз қирқ тўртинчи ҳадис
Абу Ҳанифа (р.а.) Абдулмаликдан, у Амр Журашийдан, у Саид ибн Зайддан ривоят қилади. Саид ибн Зайд (р.а.) айтдилар: «Набий (с.а.в.): бундай дедилар: «Қўзиқорин (ер тагида ўсувчи) неъматлардандир. Унинг суви кўзга шифо бўлади».
Тўрт юз қирқ бешинчи ҳадис
Абу Ҳанифа (р.а.) Ҳайсамдан, у Абу Солиҳдан, у Абу Ҳурайрадан (р.а.) ривоят қилади. Абу Ҳурайра (р.а.) айтдилар: «Набий (с.а.в.): «Кимки эрталаб: «Аузу бикалиматиллаҳиттомма - Аллоҳнинг комил сўзларига (Қуръонга) юкинаман», деган сўзларини уч марта айтса, оқшомгача чаён унга зарар қилмайди. Ким бу сўзни оқшом пайти айтса, эрталабгача унга чаён зарар етказмайди», дедилар».
Бир ривоятда: «Аллоҳнинг комил сўзларига (Қуръонга) юкинаман» сўзини қуёш чиқмасдан олдин, тонгда уч марта айтса, у кун чаён у кимсга зарар беролмайди. Оқшом вақти айтса, тонггача чаён унга зарар беролмайди» шаклда келган.
Тўрт юз қирқ олтинчи ҳадис
Абу Ҳанифа (р.а.) Муслимдан, у Иброҳимдан, у Мафукдан, у Оиша онамиздан (р.а.) ривоят қилади. Оиша онамиз (р.а.) айтдилар: «Расулуллоҳ (с.а.в.) бир касални кўришга борганларида: «Эй инсонларнинг Рабби, касалликни кетказ. Шифо бергувчи ёлғиз Ўзингсан. Сенинг шифонгдан ўзга шифо йўқ. Касалликдан асорат қолдирмайдиган шифо бер, ё Раббий!..»дер эдилар».
Тўрт юз қирқ еттинчи ҳадис
Абу Ҳанифа (р.а.) Абдуллоҳдан, у Ибн Умардан (р.а.) ривоят қилади. Ибн Умар (р.а.) айтдилар: «Расулуллоҳ (с.а.в.) бундай деб марҳамат қилдилар:
- Мўмин нафсини разил хор этмаслиги керак.
Дейилдики:
- Мўмин нафсини қандай хор қилади?
- Кучи (тоқати) етмайдиган болаларни сўрайди, кучи етмайдиган нарсаларга ўзини уринтиради, - дедилар Расули Акрам (с.а.в.)»
Тўрт юз қирқ саккизинчи ҳадис
Абу Ҳанифа (р.а.) Жобир ибн Абдуллоҳдан ривоят қилади. Жобир (р.а.) айтдилар: «Набий (с.а.в.) ҳузурларига ансордан бир киши келди ва:
- Ё Расулуллоҳ, мен ҳеч фарзанд кўрмадим. Менинг болам йўқ, - деди.
Шунда Расули Акрам (с.а.в.) унга:
- Кўп истиғфор айтишдан, сенга ризқ қилиб берилган нарсалардан садақа қилишдан сени нима тўхтатиб (тўсиб) турибди, - дедилар.
Ҳазрати Пайғамбаримизнинг (с.а.в.) бу сўзларидан сўнг халиги одам жуда кўп истиғфор қилиб кўплаб садақалар берди.
Жобир (р.а.) айтдилар: «Ўша одам тўққиз ўғил фарзанд кўрди».
Тўрт юз қирқ тўққизинчи ҳадис
Абу Ҳанифа (р.а.) Исмоилдан, у Солиҳдан, у Умму Ҳонийдан (р.а.) ривоят қилади. Умму Ҳоний (р.а.) айтдилар: «Расулуллоҳ (с.а.в.) айтдилар: «Ким Аллоҳ уни афв этишини билса (умид қилса - Тарж.) у афв этилгандир, кечирилгандир».
Тўрт юз эллигинчи ҳадис
Абу Ҳанифа (р.а.) Ҳаммоддан, у Абу Воилдан, у Ибн Масъуддан (р.а.) ривоят қилади. Ибн Масъуд (р.а.) айтдилар: «Расулуллоҳ (с.а.в.): «Шубҳасизки, Аллоҳ таоло исмларидан бири Саломдир (яъни, айбу нуқсондан покдир). Саломатлик Ундандир».
|