346 (1315) 3164. Ибн Умар розияллоҳу анҳудан ривоят қилинади:
«Аббос ибн Абдулмутталиб Расулуллоҳ соллаллоҳу алайҳи васалламдан Мино кечаларида сувчилик қилиши туфайли Маккада тунашга изн сўради. У зот унга изн бердилар».

000 (000) 3165. Бу ерда юқоридаги ҳадис такрор келган.

347 (1316) 3166. Бакр ибн Абдуллоҳ ал-Музанийдан ривоят қилинади:
Ибн Аббос билан бирга Каъбанинг ёнида ўтирган эдим. Унинг олдига бир аъробий келди ва:
«Не бўлдиким, мен амакиваччаларингиз асал ва сут билан суғорганда, сизлар набийз билан суғораётганингизни кўрмоқдаман. Бу сизнинг ҳожатингиз борлиги учунми ёки бахиллигингизданми?!» деди.
Шунда Ибн Аббос:
«Аллоҳга ҳамд бўлсин! Бизнинг ҳожатимиз ҳам, бахиллигимиз ҳам йўқ. Набий соллаллоҳу алайҳи васаллам уловларига миниб келдилар. Орқаларида Усома бор эди. У зот сув сўрадилар. Биз у зотга бир идишда набийз бердик. У зот ичдилар ва ортганини Усомага бердилар ҳамда: «Яхши қилдингиз, гўзал қилдингиз, шундоқ қилинглар!» дедилар. Бас, биз Расулуллоҳ соллаллоҳу алайҳи васаллам амр қилган нарсани ўзгартиришни истамаймиз», деди».