(890) 10. Умму Атийядан (р.а.) ривоят қилинади. Набий (с.а.в.) икки ҳайит намозини ўқиш учун балоғатга етган жория ва уйдаги мастура аёлларимизни намозгоҳга чиқишига буюриб, ҳайз кўрган аёлларни мусулмонлар намозгоҳидан четланишга буюрдилар.

(…) 11. Умму Атийядан (р.а.) ривоят қилинади. Икки ҳайит намозига уйдаги мастуралар ва балоғатга етган жория қизлар чиқишимизга буюрилар эдик. Ўшанда ҳайз кўрган аёллар ҳам (намозгоҳга) чиқиб, одамлар ортида туриб, одамлар билан бирга такбир айтишар эди.

(…) 12. Умму Атийядан (р.а.) ривоят қилинади. Расулуллоҳ (с.а.в.) бизга фитр ва қурбонлик ҳайит намозларида балоғатга етган жория қизлар, ҳайз кўрганлар ва мастура аёллар (намозгоҳга) чиқишларини буюрардилар. Аммо ҳайз кўрганлар намозга қатнашмасдан, яхшилик ва мусулмонлар даъватида иштирок этишар эди. Мен: "Эй Аллоҳнинг расули! Бизларнинг айримларимизда ёпинчиқ (паранжи) бўлмайдику?" десам, у зот: "Синглиси (дугонаси)ни ёпинчиғини кийсин", дедилар.