Анас розияллоҳу анҳудан ривоят қилинади: «Набий соллаллоҳу алайҳи васаллам Мадинага келганларида ва масжид бино қилишга амр қилганларида: «Эй Бани Нажжор! Мен билан мана бу боғингизни баҳолашинглар», дедилар. «Йўқ! Аллоҳга қасамки, унинг баҳосини фақат Аллоҳдан сўраймиз», дейишди. Бас, у Зот уни олиб, масжид қурдилар». Бухорий, Муслим, Абу Довуд.
Усмон розияллоҳу анҳудан ривоят қилинади: «Расулуллоҳ соллаллоҳу алайҳи васаллам: «Ким Рума қудуғини ковласа, унга жаннат бўлур, деганларида уни мен кавладим». Бухорий, Термизий ва Насаий ривоят қилган.
Саъд ибн Убода розияллоҳу анҳудан ривоят қилинади: «У киши розияллоҳу анҳу: «Эй Аллоҳнинг Расули, Умму Саъд вафот этди. Қайси садақа афзал?» деди. «Сув», дедилар у Зот. Бас, у қудуқ қазиди ва: «Бу Умму Саъдга», деди». Абу Довуд ва Насаий ривоят қилишган ва: «Ана ўша Саъднинг Мадинадаги сув бериши»ни зиёда қилишган.
|