Анас розияллоҳу анҳудан ривоят қилинади:
«Набий соллаллоҳу алайҳи васаллам ансорийларни уларга Баҳрайндан ер бўлиб бериш учун чақирдилар.
Бас, улар:
«Эй Аллоҳнинг Расули, агар бундоқ қиладиган бўлсангиз, қурайшлик биродарларимизга ҳам, худди шунга ўхшаш нарса ёзиб беринг», дейишди.
Пайғамбар соллаллоҳу алайҳи васалламнинг ундоқ нарсага имконлари йўқ эди. Шунинг учун:
«Албатта, мендан кейин қизғончилик кўрурсизлар. Бас, менга мулоқот бўлгунча сабр қилинг­лар», дедилар».
Имом Бухорий ривоят қилган.

Воил розияллоҳу анҳудан ривоят қилинади:
«Набий соллаллоҳу алайҳи васаллам унга Ҳазарамавтдан суюрғол ер ажратиб берганлар ва у билан бирга ўша ерни ажратиб бериш учун Муовияни юборганлар».
Абу Довуд ва Термизий ривоят қилишган ва саҳиҳ, дейилган.

Амр ибн Ҳурайс розияллоҳу анҳудан ривоят қилинади:
«Расулуллоҳ соллаллоҳу алайҳи васаллам менга Мадинадан камон билан чизиб ҳовли-жой ўрни кўрсатиб бердилар ва: «Зиёда қилурман, зиёда қилурман», дедилар».

 Пайғамбар соллаллоҳу алайҳи васаллам Билол ибн Ҳорис ал-Музанийга Қабалнинг конларини ажратиб бердилар. Ана ўша конлардан бугунгача закотдан бошқа нарса олинмайди.
Пайғамбар соллаллоҳу алайҳи васаллам унга:
«Бисмиллаҳир роҳманир роҳийм. Бу Муҳаммад Расулуллоҳ Билол ибн Ҳорис ал-Музанийга берган нарсадир. Унга Қабалнинг конларини берди; тепаликларини ва пастликларини, Қудс(тоғи)нинг зироатга яроқли жойларини берди. Мусулмоннинг ҳақи бўлган (жой)ни бермади», деб ёзиб бердилар».
Икковини Абу Довуд ривоят қилган.