Ибн Умар розияллоҳу анҳудан ривоят қи-линади:
«Расулуллоҳ соллаллоҳу алайҳи васаллам:
«Эй Аллоҳим! Соч олдирганларга раҳм қилгин!» дедилар.
«Қисқартирганларни ҳамми, эй Аллоҳнинг Расули!?» дейишди.
«Эй Аллоҳим! Соч олдирганларга раҳм қилгин!» дедилар.
«Қисқартирганларни ҳамми, эй Аллоҳнинг Расули!?» дейишди.
«Қисқартирганларни ҳам», дедилар».
Бухорий, Муслим, Абу Довуд.

Анас розияллоҳу анҳудан ривоят қилинади:
«Расулуллоҳ соллаллоҳу алайҳи васаллам тошни отиб, қурбонликларини сўйиб бўлганларидан кейин сартарошга ўнг томонларини тутдилар. У сочни олди. У зот уни Абу Толҳага бердилар. Сўнгра сартарошга чап томонларини тутдилар. У сочни олди. У зот уни Абу Толҳага бердилар ва: «Уни одамларга тақсимлаб бер», дедилар».
Бошқа бир ривоятда:
«Бас, у уни бир тола, икки толадан қилиб, одамларга улашди», дейилган.
Бухорий, Муслим, Абу Довуд, Термизий.

Ибн Аббос розияллоҳу анҳудан ривоят қилинади:
«Аёллар соч олдиришлари лозим эмас. Аёллар соч қисқартишлари лозим».
Абу Довуд, Термизий ва Дора Қутний ривоят қилишган.

 Яна ўша кишидан ривоят қилинади:
«Бир киши Набий соллаллоҳу алайҳи васалламга:
«Тош отишдан олдин зиёрат қилдим», деди.
«ҳечқиси йўқ», дедилар.
«Сўйишдан олдин соч олдирдим», деди.
«ҳечқиси йўқ», дедилар.
«Тош отишдан олдин сўйдим», деди.
«ҳечқиси йўқ», дедилар».

Бошқа бир ривоятда:
«Расулуллоҳ соллаллоҳу алайҳи васаллам видолашув ҳажида Минода одамлар учун турдилар. Улар у зотдан сўрадилар. Бир киши:
«Билмасдан сўйишдан олдин соч олдирибман», деди.
«Сўявер. ҳечқиси йўқ», дедилар.
Бошқа бири келиб:
«Билмасдан тош отишдан олдин сўйибман», деди.
«Отавер. ҳечқиси йўқ», дедилар.
У зотдан ўша куни олдинга ёки кейинга сурилган нима нарса ҳақида сўралса ҳам, қилавер, ҳечқиси йўқ», дедилар».
Бухорий, Муслим, Абу Довуд, Термизий, Насаий.