Абдураҳмон ибн Язийд розияллоҳу анҳудан ривоят қилинади: «У Ибн Масъуд билан бирга ҳаж қилди. Унинг катта тош отишни етти майда тош ила чап томонини қиблага, ўнг томонини Минога қилиб туриб отганини кўрди. Сўнгра: «Шу мақомда у зотга Бақара сураси нозил бўлган», деди». Бухорий, Абу Довуд, Термизий, Насаий.
Жобир розияллоҳу анҳудан ривоят қилинади: «Набий соллаллоҳу алайҳи васалламнинг ҳайит куни уловлари устида туриб тош отаётганларини ва: «ҳаж ибодатларингизни мендан олишларингиз учун. Мен билмайман, эҳтимол ушбу ҳажимдан кейин ҳаж қилмасман», деганларини кўрдим». Муслим, Абу Довуд ва Аҳмад ривоят қилишган.
Яна ўша кишидан ривоят қилинади: «Расулуллоҳ соллаллоҳу алайҳи васаллам ҳайит куни тошни чошгоҳ пайтида отдилар. Ундан кейин қуёш заволга кетгандан сўнг». Бухорий, Муслим, Абу Довуд, Термизий, Насаий.
Қудама ибн Абдуллоҳ розияллоҳу анҳудан ривоят қилинади: «Набий соллаллоҳу алайҳи васалламнинг тошни туя устида туриб отаётганларини кўрдим. Уриш ҳам, қувиш ҳам, нари тур-бери тур ҳам йўқ». Насаий ва Термизий ривоят қилишган.
|