Оиша розияллоҳу анҳодан ривоят қилинади:
«Эй Аллоҳнинг Расули! Сизга Минода соя бўлиши учун уй қуриб берайликми?» дедик.
«Йўқ. Мино ким олдин келса, туясини чўктираверадиган макондир», дедилар».
Абу Довуд ва Термизий ривоят қилишган.

Саҳобалардан бир киши деди:
«Набий соллаллоҳу алайҳи васаллам Минода одамларга хутба қилдилар ва уларни жой-жойларига туширдилар. У зот «Муҳожирлар мана бу ерга тушсинлар, деб қибланинг ўнг томонига ишора қилдилар. Ансорлар бу ерга, деб қибланинг чап томонига ишора қилдилар. Сўнгра одамлар уларнинг атрофларига тушсинлар, дедилар».

Абдуллоҳ ибн Қурт розияллоҳу анҳудан ривоят қилинади:
«Набий соллаллоҳу алайҳи васаллам Аллоҳнинг ҳузурида кунларнинг энг улуғи (қурбонлик) сўйиш кунидир. Сўнгра қарор топиш кунидир», дедилар».
Иккисини Абу Довуд ривоят қилган.

Ибн Умар розияллоҳу анҳудан ривоят қилинади:
«Аббос розияллоҳу анҳу Набий соллаллоҳу алайҳи васалламдан Мино кечаларида сувчилик қилиши туфайли Маккада тунашга изн сўради. У зот унга изн бердилар».
Бухорий, Муслим, Абу Довуд, Насаий