Абдуллоҳ ибн Амр розияллоҳу анҳудан ривоят қилинади: «Менга Пайғамбар соллаллоҳу алайҳи васаллам: «ҳар ойда уч кун рўза тут. Чунки бир яхшилик ўн мисличадир. Ана ўша йил давоми рўзасига баробардир», дедилар». Бухорий, Муслим, Абу Довуд
Муслим ва Абу Довуд ривоятларида: «Ҳар ойдан уч кун рўза тутмоқлик Рамазондан Рамазонгача йил бўйи рўза тутишга тенгдир», дейилган.
Абу Зарр розияллоҳу анҳудан ривоят қилинади: «Набий соллаллоҳу алайҳи васаллам: «Ким ҳар ойдан уч кун рўза тутса, йил бўйи рўза тутганга тенгдир», дедилар. Бас, Аллоҳ азза ва жалла бунинг тасдиқини ўз китобида нозил қилди: «Ким бир яхшилик қилса, унга ўшанинг ўн мисли берилур. Бир кун ўн кунга тенг». Термизий ривоят қилган ва саҳиҳ деган.
Муоза ал-Адавия розияллоҳу анҳо Оишага: «Расулуллоҳ соллаллоҳу алайҳи васаллам ҳар ойдан уч кун рўза тутармидилар?» деди. «ҳа», дедилар. «Ойнинг қайси кунларида рўза тутардилар?» деди. «Ойнинг қайси кунларида рўза тутишга эътибор бермас эдилар», дедилар». Муслим, Абу Довуд ва Термизий ривоят қилишган.
|