Савобон розияллоҳу анҳудан ривоят қилинади:
«Пайғамбар соллаллоҳу алайҳи васалламга у зот жаноза билан кетаётганларида улов келтирилди. У зот минишдан бош тортдилар. Қайтаётганларида яна улов келтирилган эди, миндилар».
Бу ҳақда у зотдан сўралганда:
«Фаришталар юриб борар эдилар. Улар юриб кетаётганда мен миниб олсам, бўлмас эди. Улар кетганларидан кейин миндим», дедилар».
Абу Довуд ривоят қилган.

Расулуллоҳ соллаллоҳу алайҳи васаллам жанозага чиққанларида отлиқларни кўриб қолиб:
«Уялмайсизларими?! Аллоҳнинг фаришталари пиёда юрибдилару, сиз бўлсангиз жонворга миниб олибсиз!» дедилар».
Термизий ва Ибн Можа ривоят қилган.

Анас розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Маййитга уч нарса эргашади. Иккитаси қайтиб, биттаси у билан қолади. Унга аҳли, моли ва амали эргашади. Аҳли ва моли қайтади. Амали қолади», дедилар».
Бухорий, Муслим ва Термизий ривоят қилган.