Анас розияллоҳу анҳудан ривоят қилинади: «Пайғамбар соллаллоҳу алайҳи васаллам: «Одамлардан бир мусулмоннинг бегуноҳ (ёш) уч фарзанди вафот этган бўлса, албатта, Аллоҳ уни уларга бўлган раҳмати туфайли жаннатга киритади», дедилар». Бухорий ва Насаий ривоят қилган. Насаийнинг бир ривоятида: «Икки мусулмоннинг ораларидан бўлган бегуноҳ уч фарзанди ўлса, албатта, Аллоҳ икковларини уларга бўлган раҳмати туфайли жаннатга киритади. У (бола)ларга: «Жаннатга киринглар!» дейилади. Улар: «Ота-онамиз кирмагунча кирмаймиз», дейдилар. «Сиз ҳам, ота-онангиз ҳам киринглар»-дейилади.
Абу Ҳурайра розияллоҳу анҳудан ривоят қилинади: «Қайси бир мусулмоннинг учта боласи ўлса, унинг дўзахга кириши мумкин эмас. Магар қасамни ечиш учунгина киради», дедилар». Бухорий, Муслим, Термизий, Насаий ривоят қилган.
Абу Саъид розияллоҳу анҳудан ривоят қилинади: «Аёллар Пайғамбар соллаллоҳу алайҳи васалламга, бизга ҳам бир кун таъйин қилинг, дейишди. Бас, У зот уларга ваъз қилдилар ва: «Қайси бир аёлнинг учта фарзанди ўлса, улар унинг учун дўзахдан парда бўлурлар», дедилар. «Иккита бўлсачи?» деди бир аёл. «Иккита бўлса ҳам», дедилар У зот». Бухорий, Муслим ва Насаий ривоят қилган.
«Бир аёл бемор бўлиб турган боласини олиб келиб: «Эй, Аллоҳнинг Расули, бундан қўрқяпман, олдин учтасини берганман», деди. У зот соллаллоҳу алайҳи васаллам: «Батаҳқиқ, дўзхдан мустаҳкам қўрғон ила ўралибсан», дедилар». Насаий ва Муслим ривоят қилган.
Абдуллоҳ розияллоҳу анҳудан ривоят қилинади: «Пайғамбар соллаллоҳу алайҳи васаллам: «Ким боласидан балоғатга етмаган учтасини берган бўлса, улар унга дўзахдан мустаҳкам қўрғон бўлурлар», дедилар. «Мен иккитасини тақдим қилганман», деди Абу Зарр. «Иккитаси ҳам», дедилар У зот. «Мен биттасини тақдим қилганман», деди, қориларнинг улуғи Убай ибн Каъб. «Биттаси ҳам. Лекин ана ўша биринчи зарба пайтида...», дедилар У зот».
Ибн Аббос розияллоҳу анҳудан ривоят қилинади: «Пайғамбар соллаллоҳу алайҳи васаллам: «Менинг умматимдан кимнинг иккита фарати бўлса Аллоҳ уни ўшалар туфайли жаннатга киритади», дедилар. «Сизнинг умматингиздан битта фарати бўлган одамчи?» деди Оиша. «Битта фарати бор одамни ҳам, Эй, муваффақ қилинган», дедилар у зот. «Сизнинг уматингиздан фарати бўлмаган одамчи?» деди Оиша. «Мен, умматимнинг фаратиман. Ҳеч менинг (вафотим)га ўхшаш мусибатга учрамаслар», дедилар».
Абу Мусо розияллоҳу анҳудан ривоят қилинади: «Пайғамбар соллаллоҳу алайҳи васаллам: «Қачон бир банданинг боласи ўлса Аллоҳ Ўз фаришталарига: «Бандамнинг боласини қабз қилдингизми?» дейди. «Ҳа», дейдилар. «Унинг дил мевасини қабз қидингизми?» дейди. «Ҳа», дейдилар. «Бандам нима деди?» дейди. «Сенга ҳамд ва истиржоъ айтди», дейдилар. Шунда Аллоҳ: «Бандамга жаннатда бир уй бино қилинглар ва уни, ҳамд уйи, деб номланглар», дейди». Ушбу уч ҳадисни Термизий ривоят қилган.
|