Умар розияллоҳу анҳу ушбу оят ҳақида: «Қандоқ ҳам яхши икки идл ва илова», деган. Бухорий ривоят қилган.
Анас розияллоҳу анҳудан ривоят қилинади: «Пайғамбар соллаллоҳу алайҳи васаллам бир қабр олдида йиғлаб ўтирган аёлнинг ёнидан ўтаётиб унга: «Аллоҳдан қўрқ ва сабр қил», дедилар. У аёл: «Нари тур! Менга етган мисибат сенга етгани йўқ!» деди. Аёл у зотни танимаган эди. Унга, ҳалиги одам, Пайғамбар соллаллоҳу алайҳи васаллам эдилар, дейилди. Бас, у Он ҳазратнинг эшикларига келди ва у ерда эшик оғаларини кўрмади ва у зотга: «Сизни танимабман», деди. Шунда У зот: «Албатта, сабр биринчи зарбададир», дедилар». Бухорий, Муслим, Абу Довуд, Термизий, Насаий ривоят қилган.
Оиша розияллоҳу анҳодан ривоят қилинади: «Пайғамбар соллаллоҳу алайҳи васаллам: «Мўминга тикон кириши ва ундан юқорироқ мусибат етса ҳам, албатта, Аллоҳ ўша туфайли унинг даражасини кўтаради ва гуноҳини ювади», дедилар». Термизий ва Муслим ривоят қилган.
Муҳаммад ибн Холид ас-Суламийдан у отасидан, у бобосидан ривоят қилган: «Пайғамбар соллаллоҳу алайҳи васаллам: «Албатта, Аллоҳдан бир бандага мартаба бериш кетган бўлса-ю, унга банда амали билан етмаган бўлса, Аллоҳ уни жасадида, ё молида, ё боласида балога гирифтор қилади. Сўнгра уни ана ўшанга токи Аллоҳдан унинг учун кетган мартабага эриштиргунча сабр қилдиради», дедилар». Абу Довуд ривоят қилган.
Уммул Аълаа розияллоҳу анҳодан ривоят қилинади: «Беморлигимда Пайғамбар соллаллоҳу алайҳи васаллам мени кўргани келдилар ва: «Эй, Уммул Аълаа, севинавер, мусулмоннинг касали туфайли Аллоҳ унинг хатоларини худди олов олтин ва кумушнинг кирини кетказгандек кетказади», дедилар». Абу Довуд ривоят қилган.
Абу Мусо розияллоҳу анҳудан ривоят қилинади: «Пайғамбар соллаллоҳу алайҳи васаллам: «Қачон банда бемор бўлиб қолса ёки сафарга чиқса, Аллоҳ таоло унга соғлик ва муқим вақтида қиладиган амалларнинг ажрини ёзади», дедилар». Аҳмад, Бухорий ва Абу Довуд ривоят қилган.
|