Анас розияллоҳу анҳудан ривоят қилинади:
«Пайғамбар соллаллоҳу алайҳи васаллам билан Абу Сайф ал-Қайннинг олдига кирдик. У Иброҳимнинг эмузукли отаси эди. Пайғамбар соллаллоҳу алайҳи васаллам Иброҳимни олиб ўпдилар ва ҳидладилар. Сўнгра яна унинг олдига Иброҳим жон бераётганда кирдик. Пайғамбар соллаллоҳу алайҳи васалламнинг кўзларидан ёш оқа бошлади. Шунда Абдурраҳмон ибн Авф У зотга:
«Сиз ҳамми, Эй, Аллоҳнинг Расули...?!» деди. У зот:
«Эй, Ибн Авф, бу, раҳматдир», дедилар ва яна йиғладилар. Сўнгра У зот соллаллоҳу алайҳи васаллам:
«Албатта, кўз ёш тўкади, қалб маҳзун бўлади, аммо Роббимизни рози қиладиган нарсадан бошқани айтмаймиз. Албатта, биз сенинг фироқингдан жуда маҳзунмиз, Эй, Иброҳим», дедилар».
Бухорий, Муслим, Абу Довуд, Термизий ривоят қилган

Ибн Умар розияллоҳу анҳумодан ривоят қилинади:
«Саъд ибн Убода бемор бўлиб қолди. Расулуллоҳ соллаллоҳу алайҳи васаллам Абдурраҳмон ибн Авф, Саъд ибн Абу Ваққос ва Абдуллоҳ ибн Аббос розияллоҳу анҳумлар билан уни кўргани келдилар. Бас, унинг олдига кириб хушсиз ётганини кўрдилар. У зот:
«Қазо қилдими?» дедилар.
«Йўқ, Эй Аллоҳнинг Расули», дейишди.
Шунда Расулуллоҳ соллаллоҳу алайҳи васаллам йиғладилар. У зотнинг йиғиларини кўриб бошқалар ҳам йиғлашди. Кейин У зот:
«Эшитмайсизларми? Албатта, Аллоҳ кўз ёши ва қалб маҳзунлиги ила азобламайди. Лекин, мана бу билан азоблайди ёки раҳим қилади», дедилар ва тилларига ишора қилдилар».
Бухорий, Муслим ривоят қилган.

Анас розияллоҳу анҳудан ривоят қилинади:
«Пайғамбар соллаллоҳу алайҳи васаллам:
 «Байроқни Зайд олди, мусибатга учради. Сўнгра уни Жаъфар олди, мусибатга учради. Сўнгра, уни Ибн Равоҳа олди, мусибатга учради. Расулуллоҳ соллаллоҳу алайҳи васалламнинг икки кўзлари ёш тўкар эди. Сўнгра уни Холид ибн Валид амирликни олди ва унга фатҳ берилди», дедилар.

Яна ўша кишидандан ривоят қилинади:
«Расулуллоҳ соллаллоҳу алайҳи васаллам қорилар қатл қилинганида бир ой қунут ўқидилар. У зотнинг бундан кўра ашаддийроқ маҳзун бўлганларини ҳеч кўрмадим».
Бухорий, Муслим ривоят қилган.