Абдуллоҳ розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Ким юзларига урса, ёқаларини йиртса ва жоҳилият даъвати ила чақирса, биздан эмас», дедилар».
Бешовларидан фақат Ау Довуд ривоят қилмаган.

Абу Мусо розияллоҳу анҳудан ривоят қилинади:
«Расулуллоҳ соллаллоҳу алайҳи васаллам бақириб йиғловчи, сочини олдириб ташловчи ва кийимини йиртувчи аёллардан воз кечганлар».
Бухорий, Муслим, Абу Довуд, Насаий ривоят қилган.

Абу Молик ал-Ашъарий розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Жоҳилият ишидан тўрт нарса менинг умматимда бордир. Уларни тарк қилмаслар; Ҳасаблар ила фахрланиш, насабларга тил текказиш, юлдузлардан истисқо сўраш, овоз чиқариб, айтиб йиғлаш», дедилар. Яна У зот:
«Агар йиғи солувчи аёл ўлимидан олдин тавба қилмаса, қиёмат куни устида қатирондан бўлган лозим ва қичиқтидан бўлган кўйлак билан тирилтирилади», дедилар».
Муслим ва Термизий ривоят қилган.
Термизийнинг лафзида:
«Жоҳилият ишидан тўрт нарса менинг умматимда бор. Одамлар уларни ҳеч қўймаслар; Айтиб йиғлаш, ҳасабларга тил текказиш, (касал) юқди дейиш. Бир туя қўтир бўлди. Юз туяни қўтир қилди (дейдилар). Биринчи туяни ким қўтир қилибди? Ва ёғинни юлдузлардан деб билиш. У билан, бу билан бизга ёмғир ёғди, дейиш», дейилган.

Умму Атияя розияллоҳу анҳодан ривоят қилинади:
«Пайғамбар соллаллоҳу алайҳи васаллам бизларни айтиб йиғлашдан қайтардилар».
Бухорий, Муслим, Абу Довуд ривоят қилган.

Абу Саъид розияллоҳу анҳудан ривоят қилинади:
«Расулуллоҳ соллаллоҳу алайҳи васаллам айтиб йиғловчи аёлни ва уни тингловчи аёлни лаънатладилар.
Бухорий, Муслим, Абу Довуд ривоят қилган.