Абу Саъид розияллоҳу анҳудан ривоят қилинади: «Пайғамбар соллаллоҳу алайҳи васаллам: «Жон таслим қилаётганларингизга «Лаа илаҳа иллалоҳу»ни талқин қилинглар», дедилар». Муслим, Абу Довуд, Термизий, Насаий ривоят қилган.
Муоз ибн Жабал розияллоҳу анҳудан ривоят: «Пайғамбар соллаллоҳу алайҳи васаллам: «Кимнинг охирги каломи «Лаа илаҳа иллаллоҳу» бўлса жаннатга киради», дедилар». Абу Довуд, Термизий ва ал-Ҳоким ривоят қилган, ва, саҳиҳ, деган.
Умму Салама розияллоҳу анҳудан ривоят қилинади: «Пайғамбар соллаллоҳу алайҳи васаллам: «Қачон бемор ёки ўлаётган киши ҳузурида ҳозир бўлсангиз яхши гап айтинг. Чунки, фаришталар сиз айтаётган нарсага, Омин! деб турадилар», дедилар. Абу Салама ўлганда Пайғамбар соллаллоҳу алайҳи васалламнинг ҳузурларига келдим ва: «Эй, Аллоҳнинг Расули, Абу Салама ўлди», дедим. «Эй, бор Худоё, мени ҳам, уни ҳам мағфират қилгин ва менга ундан яхши орқадан қолувчи бергин, деб айт», дедилар. Мен уни айтдим ва Аллоҳ менга ундан яхши ортдан қолувчини, Муҳаммад соллаллоҳу алайҳи васалламни берди», дедилар». Муслим, Абу Довуд, Термизий, Насаий ривоят қилган.
Яна ўша кишидан ривоят қилинади: «Пайғамбар соллаллоҳу алайҳи васаллам Абу Саламанинг устига кирганларида унинг кўзи очилиб қолган эди. Бас, У зот қовоқларини ёпиб қўйдилар. Сўнгра: «Қачон руҳ қабз қилинса, кўз унга эргашиб қолади», дедилар. У(Абу Салама)нинг аҳлидан баъзи одамлар шовқин кўтардилар. Шунда У зот: «Ўзингизга фақат яхшилик тилаб дуо қилинглар. Чунки, фаришталар сиз айтаётган нарсага, омин, деб турадилар», дедилар. Кейин эса: «Эй, бор Худоё! Абу Саламани мағфират қил. Унинг даражасини ҳидоятда бўлганлар ичида кўтар. Ундан кейин ортидан қолганларга Ўзинг ўрнига бўл. Бизни ҳам, уни ҳам мағфират қил, Эй, Оламларнинг Роббиси Унга қабрини кенг қил ва унга қабрини мунаввар қил», дедилар». Муслим ривоят қилган.
Маъқил ибн Ясар розияллоҳу анҳудан ривоят қилинади: «Пайғамбар соллаллоҳу алайҳи васаллам: «Ўликларнингизга «Ясин»ни қироат қилинг», дедилар». Абу Довуд, Насаий, Аҳмад ва Ибн Ҳиббон ривоят қилган.
|