Ибн Умар розияллоҳу анҳудан ривоят қилинади:
«Умар бозорда сотилаётган қалин ипакдан бўлган чопонни олиб Расулулоҳга келтирди ва:
«Эй, Аллоҳнинг Расули, мана буни сотиб олинг ва у билан ийд ва вакиллар гуруҳи учун ясаниб юринг», деди. Шунда Расулулоҳ соллаллоҳу алайҳи васаллам унга:
«Бу фақат насибаси йўқларнинг либосидир», дедилар. Умар бундан кейин Аллоҳ хоҳлаганича юриб турди. Сўнгра Расулулоҳ соллаллоҳу алайҳи васаллам унга дебож - нафис ипак - дан бўлган чопон юбордилар. Умар уни олиб Расулулоҳнинг ҳузурларига келди ва:
«Эй, Аллоҳнинг Расули, Сиз, албатта, бу насибаси йўқларнинг либоси, деган эдингиз. Менга бу чопонни юборибсиз?» деди. Расулулоҳ унга:
«Уни сотасан ва ҳожатингга ишлатасан», дедилар».
Бухорий, Муслим, Абу Довуд, Насаий ривоят қилган.

Абу Рамса розияллоҳу анҳудан ривоят қилинади:
«Пайғамбаримиз соллаллоҳу алайҳи васалламни икки яшил тўн кийиб олиб хутба қилаётганларини кўрдим».
Насаий ривоят қилган.