Оиша розияллоҳу анҳога у кишининг қуллари Заквон мусҳафга қараб имомлик қилар эди.
Бухорий ва Шофеъий ривоят қилган.

Ибн Умар розияллоҳу анҳудан ривоят қилинади:
«Биринчи муҳожирлар ал-Асбага – Қубо яқиндандаги жойга – келганларида уларга Абу Ҳузайфанинг озод қилган қули Солим имомлик қилар эди. У ичларида Қуръонни энг кўп биладигани эди».
Бухорий ва Абу Довуд ривоят қилган.

Анас розияллоҳу анҳудан ривоят қилинади:
«Пайғамбар соллаллоҳу алайҳи васаллам кўзи ожиз Абдуллоҳ ибн Умму Мактумни одамларга имом бўлиши учун ўз ўринларига қолдирганлар».
Абу Довуд, Аҳмад ва Ибн Ҳиббон ривоят қилган.

Абдурраҳмон ибн Халлод розияллоҳу анҳудан ривоят қилинади:
«Пайғамбар соллаллоҳу алайҳи васаллам Умму Варақанинг уйига бориб зиёрат қилар эдилар. Бас, у ўзига муаззин олишга изн сўради. У зот унга муаззин қилиб бердилар ва ун(Умму Варақа)га аҳлига имомлик қилишга амр қилдилар. Абдурраҳмон:
«Мен у аёлнинг муаззини қари чол эканини кўрдим», деди».
Абу Довуд ва ал-Ҳоким ривоят қилган. Ибн Хузайма, саҳиҳ, деган.

Амр ибн Салама розияллоҳу анҳудан ривоят қилинади:
«Улар Расулуллоҳ соллаллоҳу алайҳи васалламнинг ҳузурларига вакил бўлиб боришган эдилар. Ортга қайтишни ирода қилган чоғларида:
«Эй, Аллоҳнинг Расули, бизга ким имом бўлади?» дедилар. У зот:
«Қуръонни кўп жам қилганингиз ёки Қуръонни кўп олганингиз», дедилар. Мен уларнинг Қуръоннни кўп жам қилгани эдим. Бас, мени олдинга ўтказдилар. Ҳолбуки мен ёш бола эдим. Устимда шамла номли кийимим бор эди. Жармнинг қандоқ тўпламига ҳозир бўлсам уларнинг имоми бўлар эдим. Уларнинг жанозаларини ҳам ўқир эдим. Бугунги кунимгача шундоқ».
Абу Довуд, Бухорий ва Насаий ривоят қилган.

Абу Довуд ва Дора Қутний келтирган ривоятда:
«Фарз намоз ҳар бир мусулмоннинг ортидан, у яхши бўлса ҳам, фожир бўлса ҳам, кабира гуноҳларни қилса ҳам вожибдир», дейилган.