Ибн Умар розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Кечасининг намози икки ракъат, икки ракъатдир. Агар тонг отиб қолишидан қўрқсанг, бир ракъат ила витир қил. У сенга ўқиган намозингни Витр қилиб беради», дедилар».
Бухорий, Муслим, Абу Довуд, Термизий, Насаий ривоят қилган.

Яна ўша кишидан ривоят қилинади:
«Пайғамбар соллаллоҳу алайҳи васаллам:
«Витр кечанинг охирида бир ракъатдир», деганлар».
Муслим, Насаий ва Аҳмад ривоят қилган.

Абу Айюб ал-Ансорий розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Витр ҳар бир мусулмон зиммасидаги ҳақдир. Ким беш ракъатли Витр қилмоқчи бўлса, қилсин. Ким уч ракътли Витр қилмоқчи бўлса, қилсин. Ким бир ракъатли Витр қилмоқчи бўлса, қилсин», дедилар».
Абу Довуд ва Насаий ривоят қилган.

«Бошқа бир ривоятда:
«Витр ҳақдир. Бас, ким хоҳласа, етти ракъатли Витр қилсин, ким хоҳласа, беш ракъатли Витр қилсин, ким хоҳласа, уч ракъатли Витр қилсин, ким хоҳласа, бир ракъатли Витр қилсин»-дейилган.

Умму Салама розияллоҳу анҳодан ривоят:
«Пайғамбар соллаллоҳу алайҳи васаллам ўн уч ракъатли Витр қилар эдилар. Ёшлари катта бўлиб заифлашганларида, етти ракъатли Витр қилдилар».
Термизий ва Насаий ривоят қилган.

Толқ ибн Али розияллоҳу анҳудан ривоят қилинади:
«Расулуллоҳ соллаллоҳу алайҳи васалламнинг:
«Бир кечада икки Витр бўлмас, деганларини эшитдим».
Абу Довуд, Термизий, Насаий ривоят қилишган.