Ибн Умар розияллоҳу анҳудан ривоят қилинади: «Пайғамбар соллаллоҳу алайҳи васаллам: «Аллоҳ покликсиз намозни ва хиёнат аралашган садақани қабул қилинмайди», дедилар». Муслим, Абу Довуд, Термизий, Насаий ривоят қилган.
Али розияллоҳу анҳудан ривоят қилинади: «Пайғамбар соллаллоҳу алайҳи васаллам: «Намознинг калиди покликдир, унинг ҳаром қилишлиги такбирдир ва ҳалол қилишлиги саломдир», дедилар». Абу Довуд ва Термизий ривоят қилишган. Ал-Ҳоким саҳиҳ деди.
Асмаа розияллоҳу анҳодан ривоят қилинади: «Бир аёл Пайғамбар соллаллоҳу алайҳи васалламнинг ҳузурларига келиб: «Биздан биримизнинг кийимига ҳайзнинг қонидан тегиб қолади, уни қандоқ қилади?» деди. У зот соллаллоҳу алайҳи васаллам: «Уни ишқайди, кейин сув билан ювади, сўнгра сув қуяди ва унда намоз ўқийверади», дедилар». Бухорий, Муслим, Абу Довуд, Термизий, Насаий ривоят қилган.
Абу Саъид розияллоҳу анҳудан ривоят қилинади: «Расулуллоҳ соллаллоҳу алайҳи васаллам Асҳобларига намоз ўқиб бераётиб, бирдан, ковушларини ечиб, ўзларидан чап томонга қўйдилар. Буни кўриб, қавм ҳам ковушларини ечди. Расулуллоҳ соллаллоҳу алайҳи васаллам намозни ўқиб бўлганларидан кейин: «Ковушларингизни ечишингизга нима олиб борди?» дедилар. Улар: «Сизнинг ковушларингизни ечганингизни кўриб, биз ҳам ечдик», дейишди. Шунда у зот: «Жиброил алайҳиссалом келиб менга уларда нопок нарса борлигини хабар қилди», дедилар ва: «Қачон бирортангиз масжидга келса, назар солсин, агар ковушларида нопоклик кўрса, артиб ташласин ҳамда улар билан намоз ўқийверсин» деб қўшиб қўйдилар». Абу Довуд, Аҳмад ва ал-Ҳоким ривоят қилишган.
Оиша розияллоҳу анҳодан ривоят қилинади: «Пайғамбар соллаллоҳу алайҳи васаллам: «Қачонки бирортангиз намозида таҳоратини кетказиб қўйса, бурнини ушласинда, сўнгра қайрилиб чиқиб кетсин», дедилар». Абу Довуд ва ибн Можа ривоят қилганлар.
|